Цаһан нур хагсчана

31-08-2021, 15:19 | Таңһчин зәңгс » Зіњг

Хальмгин усна тогталмуд дунд Цаһан нур онц орман эзлнә. Сүл җилмүдт нуурт усн хагсад, эн төр бәәрн әмтиг үүмүлҗәнә. Урднь энд дала заһсн, зерлг һалуд болн нуһсд бәәдг билә. Нуурт урһдг хулсыг тосхлһнд өргнәр олзлдг бәәсмн. Һундл төрхд, өдгә цагт эн цуг тоот уга болв.
Цаһан-Нур селәнә медәт Даван Борисин келсәр, кесг җил хооран нааран нертә номт, «В мире животных» телесоңсхврин һардач Николай Дроздов ирәд, нуурт бәәдг аң-аһрусиг шинҗләд, эн һазрин сәәхн йиртмҗд авлгдад бәәв. Борис Альджаевич Цаһан нуурин көвәд 1957-ч җиләс авн бәәнә. Һанцарн бәәдг учрар ик биш эдл-аху гертән бәрнә. Үрднь, ачнр-зеенрнь өсәд-босад, талдан балһсдт көдлҗ йовна. Өдгә цагт Цаһан-Нуурт бәәдг әмтнә тонь йир баһрв, урднь кесг миңһн күн бәәдг бәәсмн, гиҗ Борис Альджаевич келнә. Поселкд эмнлһ, аптек чигн уга, района Ик Царң цутхлң тал йовхла эннь 105 дууна һазрт бәәнә. Селәнә тал дунд һанцхн худг бәәнә, эндәс дунд сурһуль болн бичкдүдин сад усар теткгднә болн әмтн малан чигн услна. Зәрмдән зунар усн худгт хагсна, усн цугтаднь күртхш, эннь бас һундлта. Хойр җил хооран Даван Борисин нилчәр худгин усн шинҗлгдҗ, санитарн некврлә ирлцҗәхш гисн шиидвр һарһгдв.
Хам-хоша бәәдг Аһшин мүҗәс усн аашна гисн зәңгиг цаһанурахн соңссн билә, зуг ода күртл усн ирәд уга. Тегәд Борис Альджаевич мана газетәр дамҗад, таңһчин һардврт эврәннь зовлңган медүлхәр зүткҗәнә, Цаһан нуурин усна тогталд онц оньган тусхатн гиҗ сурҗана. Нуурт усн орхла, әмтн төрскн һазртан хәрү ирҗ, малан асрҗ, Цаһан-Нур шинәс босххин төлә шунҗ көдлхмн гиҗ медәт иткҗәнә.

КАРСАНА Евгения