Эврә кергән эклхднь туслв

14-09-2021, 09:49 | Таңһчин зәңгс » Зіњг

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, социальн бооцан күцәмҗтәһәр бәәдл-җирһлд тохрагдҗана. Тиигәд, терүнә дөңгәр мана таңһчд кесгнь эврә керг бүтәһәд, онц эдл-ахута болад, өрк-бүлән теҗәдг болв.
Элстд бәәдг һурвн көвү асрҗах баахн эк Анна Яковлева социальн бооца батлҗ, тааста керг эклв. Урднь күүкд күн әмтәхн кегдлмүд болһҗ, онц арһлач болҗ үүлддг бәәсмн. Болв таңһчд бәәтхә, нарт-делкәд нәрн эпидемиологическ бәәдл тогтаснас иштә кергнь олз-ору авч ирдгән уурв. Тегәд эн үүлдврән зогсаһад, җирһлин күнд таалд тусв. Элст балһсна әмтиг көдлмшәр теткдг цергллтин дөңгәр Анна Яковлева социальн бооца батлад, эврәннь керг эклхд 249620 арслңга дем авв. Йилһгдсн мөңгәр эн һуйрин зүүтә кегдлмүд болһхин төлә беш болн нань чигн кергтә кергсл хулдҗ авв.
Социальн бооцан 2022-ч җилин моһа сарин 31 күртл батлгдв. Анна Яковлева арһлач болҗ алвна органд бәрмт цаасан орулв. Эврә кергән экләд, эн онц арһлач болҗ һурвн сарин туршарт күцәмҗтәһәр үүлдҗәнә.
– Би Элст балһсна әмтиг көдлмшәр тетклһнә цергллтин көдләчнрт ханлтан өргхәр седләв. Эдн нанд социальн бооца батллһна туст тодрха цәәлһвр өгв, ямаран цаас белдхиг зааҗ өгв. Батлгдсн бооцаһар нанд шаңһас мөңгн йилһгдв. 2020-ч җил мини өрк-бүлин төлә йир күнд болв, мана сарин теҗәлин кемҗән баһрад, бидн күнд таалд тусвидн. Ода би «Анна-ДесертЪ» гидг кондитерск секәд, олн зүсн кегдлмүд болһҗ хулдҗанав. Манаһур ирәд, әмтәхн кегдлмүд амстн, гиҗ хотл балһсна әмтнд болн гиичнрт үрвр кеҗәнәв, – гиҗ Анна Петровна келв.

ДАВАН Сәәхлә
ЗУРГТ: онц арһлач Анна Яковлева

Видео