Күүкд улсиг көдлмшәр теткв

14-09-2021, 10:52 | Таңһчин зәңгс » Зіњг

«Демографь» гидг келн-улсин төсвин «Көдлмшәр тетклһнд туслһн» гидг федеральн төсвин медлд мана таңһчд көдлмш уга күүкд улс немр сурһуль сурлһна болн шин эрдм даслһна керг-үүлдврмүд бүрдәгднә. Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, «Көдлмш Әрәсәд» гидг порталд таңһчин бәәрн улсас шин эрдм дасх санаһан медүлҗәх 361 эрлһн орулгдв. Тиигәд, 86 күн мергҗлтән өөдлүлҗ шин эрдм даслһнд йовулгдв, теднәснь 46 күн сурһулян төгсәв.
Эн керг-үүлдврин йовудт сурһуль сурч немр эрдм дассн улс хөөннь көдлмшәр теткгднә. Ода мана таңһчд сурһулян төгсәсн улсас көдлмшәр тетклһнә цергллтин дөң-тусар 35 күн көдлмш олҗ авв. «Демографь» гидг келн-улсин төсвин «Көдлмшәр тетклһнд туслһн» гидг федеральн төсвин керг-үүлдврмүдин ашт Көтчнрә района Өвдг селәнд бәәдг Шардан Гилән Элстин Х. Кануковин нертә багшнрин колледжд, Көглт селәнд бәәдг Светлана Рябухина болхла, хулд-гүүлгәнә-технологическ колледжд немр сурһуль сурв. Урднь көдлмш уга бәәсн күүкд улс Әрәсән Ворлдскилс агентствин региональн операторин дөңгәр эдн шин эрдм дасад, көдлмшәр теткгдв.
Одахн Өвдг болн Көглт селәдт «Демографь» гидг келн-улсин төсвин «Күүкд улсиг көдлмшәр тетклһнд туслһн – 3 нас күрәд уга бичкдүдин төлә дошкольн сурһуль-эрдмин таал тогталһн» гидг региональн төсвин халхар тосхгдв. Тегәд Шардан Гилән «Байр» гидг бичкдүдин садт сурһмҗлачар, Светлана Рябухина «Бамб цецг» садт замчар көдлҗәнә.

ДООҖАН Наталья

Видео