Тоомсрта тосхач билә

15-01-2022, 16:44 | История, Память

Давсн җилин чилгчәр бар сарин 27-д Александр Доржинович Мазуров 90 җилин өөнән темдглх бәәсмн. Эн төрскн таңһчиннь босхмҗд болн делгрлтд ик тәвцән орулсн, тосхлтын халхд олн җилдән үнн-чик седклтәһәр көдлсн күн болна. Александр Доржиновичин һардврт мана таңһчд чинртә кесг объект тосхгдсмн. Эн Хальмг ик сурһулин бат тосхлтын төрәр проректор болҗ көдлҗ йовла, тегәд университетын корпусмуд болн общежитьс энүнә һардврт тосхгдв.

1958-ч җилд хальмг улс тууврас хәрҗ ирәд, төрскн таңһчан босхҗ авхар гүҗрҗ көдлв. Тедн дунд баахн Александр Мазуров бәәсмн. «Промстрой» тосхлтын заллт баахн мергҗлтд дааврта көдлмш даалһсмн. Кергән үнн кевәр күцәдг, чадмгар бүрдәдг, дарунь чик шиидвр авдг төләдән Александр Доржинович хамдан көдлҗәх үүрмүд дунд тоомср болн күндллһ олв. Дәкәд эн әмтнлә ээлтә, цаһан седклтә, чик авг-бәрцтә күн гиҗ тодлгдв. 2005-ч җилд А.Мазуровд «Хальмг Таңһчин олн-әмтнә эдл-ахун ачта көдләч» гидг өөдән цол зүүлһгдв. Эн Ростовск технологическ техникумд йилһән сәәнәр сурад, сән мергҗлт болсмн. Техникумд сурч йовсн баһчудас ачта улс болсн оютнрин дегтрт Александр Мазуровин зург барлгдв.

Александр Доржинович эңкр эцк болн аваль бәәсмн, элгн-садндан дөңгән күргҗ, өөрхн улстан ицлтә түшг болдмн. Таисия Наркаевна авальтаһан ни-негн бәәҗ, күүкдтән чик сурһмҗ өгсмн. Һундл төрхд, ода Александр Доржинович мадн дунд уга, болв сән неринь, күцәсн кергинь олн-әмтн әрүн кевәр хадһлҗ йовна.

Юрий МАЗУРОВ
Зургт: Төрскән харсгч Алдр дәәнд орлцач
нертә ветеран М.Т.Бимбаевлә хамдан

Видео