Эрмдгтә бичкдүдин билг делгрүлхәр

12-11-2022, 12:59 | Общество

Гемтә-шалтгта бичкдүдин реабилитацин таңһчин төвин улд «Бийсмдн үүдәҗәнәвидн» гидг өдрәр үүлддг төв секгдв. Терүнд бичкдүд билг-эрдмән делгрүлҗ, үүл бәрдг, һарарн олн зүсн кегдлмүд кедгиг дасчана. Күүкд-көвүд зурлһна, хувц уйдг, модар олн зүсн кегдлмүд кедг занятьст орна. Хальмг Таңһчин ачта зурач Дорҗин Виктор, технологин багш Байнхаран Улан болн дамшлтта уяч Пүрбән Галина бичкдүдиг сурһна.
Урднь баһ наста гемтә-шалтгта улсин әңг үүлддг бичкдүдин психоневрологическ интернатын болн «Теңгрин әдстә» гидг олна бүрдәцин улд эрдмгтә бичкдүдиг асрҗах эк-эцкнрин төлә «Иньгллт» болн «Хамдан» гидг сурһульмуд секгдсн билә. Терүнд эк-эцкнр гемтә-шалтгта бичкдүдт олн әмтн дунд бийән бәрлһнә, эднә билг-эрдм делгрүллһнә, соньн җирһләр бәәлһнә төлә таал тогталһна туст дамшлт хоршана. Сурһулин йовудт мергҗлтнр эк-эцкнрт эрмдгтә бичкдүдиг асрлһна туст сүв-селвг өгч, иим күүкд-көвүд бийснь олн дунд бәәҗ чадхд дөң күргнә.
Таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан темдглсәр, эрмдгтә бичкдүдиг асрҗах эк-эцкнриг дөңнҗ, күүкд-көвүдин җирһлин таал ясруллһн мана һол керг болҗана. Тегәд иим көдлмш туста болн эркн чинртә. Бичкдүд һарин эрдмин занятьст орлцхдан йир дурта, билгтә улсла харһад, теднәс олн зүсн үүл бәрдгиг дасснь эднд ик урмд өгнә, - гиҗ Марина Петровна келв.
Келхд, таңһчин социальн делгрлтин, күч-көлснә болн көдлмшәр тетклһнә министерств Хальмг Таңһчин Толһач Хаска Батун болн таңһчин правительствин даалһврар ёирһлин күнд таалд туссн бичкдүдиг дөңнлһнә саңгин марһанд эрлһән орлусн билә. Эн саң субъектмүдт баһ тетквртә болн күнд таалд туссн өрк-бүлмүдиг дөңнлһнә керг-үүлдврмүд күцәлһнд мөңг йилһҗ өгнә. Тиигәд, саңгин шиидврәр мана таңһчд гемтә-шалтгта бичкдүдиг дөңнлһнә кергт 2022-2023 җилмүдт 14799,5 миңһн арслң йилһгдҗәнә. Эн мөңгәр гемтә-шалтгта бичкдүдиг асрҗах 215 өрк-бүлд болн 223 эрмдгтә күүкн-көвүнд дөң күрггдхмн. Хойр җилин эргцд иим өрк-бүлмүдиг дөңнлһнә региональн керг-үүлдврмүдт ут тоодан 29820,6 миңһн арслң олзлгдхмн. Җирһлин күнд таалд туссн бичкдүдиг дөңнлһнә саң йилһҗәх 14799,5 миңһн арслңгас нань таңһчин бюджетәс 15021,1 миңһн асрлң бас немхмн.
ДООҖАН Наталья
ЗУРГТ: Хальмг Таңһчин ачта зурач Дорҗин Виктор бичкдүдлә кичәл давулҗана

Видео