Селәнә эдл-ахуд көдлх баһчудыг урмдулхар

29-10-2022, 11:20 | Общество

Хулһн сарин 24-әс авн 28 күртл орн-нутгин ЮФО-н болн СКФО-н округудын тавн балһснд «Умный маршрут. Агротехнологии будущего» нертә баһчудын чуулһн болв. Энүг «Знание» Әрәсән ниицән болн Россельхозбанк бүрдәв.

Аһш, Әәдрхн, Элст, Сарпуль болн Майкоп балһсдт баһчуд ик керг-үүлдврт орлцҗ олн соньн тоот медҗ авв. Чуулһна көтлвр «Умный маршрут» федеральн төсвин йовудт күцәгдв.

Шидр үлмҗ өдрлә чуулһна бүрдәһәчнр Элст балһснд ирв. Керг-үүлдвр Б.Б.Городовиковин нертә Хальмг ик сурһулин медицинск дацңгин ул деер давулгдв. Баһчудын чуулһиг таңһчин сурһуль-эрдмин болн номин министр Булган Ангирова секв. Булган Борисовнан келсәр, иим чуулһн баһчудын төлә давулгдҗахинь йир сән йовдл болҗана, юңгад гихлә иргчдән селәнә эдл-ахун халхар көдлх улс мана таңһчд йир кергтә болна. АПК-н мергҗлтнриг белдхин төлә дунд сурһульмудт эн халхар шишлң классмуд секгдҗәнә. Дунд сурһуляс авн сурһульчнр иргч эрдмән шүүҗ сән кевәр ик сурһульд сурхар белднә гив. Тер мет Б.Ангирова чуулһна бүрдәһәчнрт болн гиичнрт ханлтан өргҗ, көдлмштнь күцәмҗ дурдв. Әрәсән Хүүвин депутат Бадм Башанкаев өдгә цагт шин технологий олн салврт өргнәр олзлгдҗахиг темдгләд, селәнә эдл-ахун халхд энүг яһҗ орулдгиг баһчудт кесг үлгүр зааҗ келв.

Б.Б.Городовиковин нертә Хальмг ик сурһулин һардачин үүлиг цаг зуур дааҗадг Эльза Мантаева вузин һардврин болн багшнрин нерн деерәс халун мендән илгәв. Терүнәс нань Россельхозбанк болн КалмГУ нөкцлтин халхар үүлдҗәхиг темдглв. Эн банк олн зүсн инновационн төсвсиг давулдгиг бас келв. «Знание» ниицән мана таңһчд кезәнәһәс авн үүлдҗәнә, темдглхәс, давсн зун җилин 70-80-ч җилмүдт ниицәнә хальмг әңгин һардач тер цагт вузин һардачар үүлдсн Анатолий Чапчаев һардҗ йовла, гиҗ Эльза Ивановна олнд тодлулв.

Россельхозбанкин финансов технологин делгрлтин төвин һардач Элеонора Добровольская чуулһна орлцачнрт соньн лекц умшв. Ямр чигн күсл өмнән тәвхлә эрк биш энүндән күрх кергтә гив. Цол уга гиҗ келҗ болшго, дурн бәәхлә цаг чигн олгдад бәәнә, гиҗ Э.Добровольская баһчудыг иткүлв. Тер мет делкәд нерән туурулсн номтнрин тускар бас үлгүрлҗ эн келв. «Россельхозбанк» АО-н стартапта көдлдг әңгин һардач Наталья Мендус селәнә эдл-ахун халхар эврә кергән секх седҗәдг улст яһҗ нөкд болдган цәәлһв. Күн болһн энүн тал ирҗ, эврәннь кергин болн төсвин тускар тодрхаһар келҗ өгнә. Түүнә хөөн цугинь учртан авч хамдан бизнес-зура тогтана, гиҗ Н.Мендус темдглв.

Ик хургин хөөн чуулһна орлцачнр соньмсулҗадг төрмүдәр мастер-классмудт орлцв. Энүнә йовудт чуулһна бүрдәһәчнр селәнә эдл-ахун халх иргчдән шин технологин эв-арһиг яһҗ олзлҗ чадхин тускар цәәлһв. 2030-ч җил күртл АПК-н халх йосн биш ухаг, эврән нисдг аппаратмудыг, робототехникиг – цуг эн тоотыг улм өргнәр олзлхмн гиҗ зуралгдҗана. Тер мет тәрә тәрәлһнә көдлмшт урһмлыг күүнә орлцллһ угаһар усар услдг аппаратмуд бас олзлгдхмн. Онц темдглхд, одахн Москвад давсн «Алтн намр» селәнә эдл-ахун һәәхүлд кесг шин аппаратмуд үзүлгдсн билә, гиҗ форумин бүрдәһәчнр темдглв.

Мастер-клаасмудын йовудт давулгдсн төсвсин марһаст оютнр болн сурһульчнр шунмһаһар орлцад, ончрсн арвтнр белгүдәр ачлгдв. Терүнәс нань таңһчин Городовиковск района Кировский селәнә лицейин селәнә эдл-ахун шишлң классин сурһульчнр АПК-н халхар белдсн төсвин тускар олнд медүлв. Келхәс, энүг форумин бүрдәһәчнр бас темдглҗ белгәр ачлв.

Ашлад келхд, эн соньн керг-үүлдвр Әрәсән регионмудар цааранднь давудгдхмн. Дарани чуулһн альд давулгдхинь «Знание» ниицәнә сайтд болн ВКонтакте ниигмин сүлҗәнд медҗ болхмн.

КАРСАНА Евгения

Видео