Таңһчин эмнлһнә мергҗлтнриг ачлв

12-01-2023, 11:31 | Общество

Шин җилин өмн өргнд П.Жемчуевин нертә таңһчин эмнлһн 120 җилин өөнән темдглв. Семен Залкинд бүрдәсн эмнлһн эн җилмүдин эргцд делгрәд, батрад мана таңһчин һоллгч эмнлһнә бүрдәц болв. Түрүләд энд зуг 14 күн эмнлһ авч чаддг бәәсн болхла, эндр энд 1000 һар күн көдлҗәнә, җилин эргцд 115 миңһн күн эмнлһ авна, 7 миңһн һар месллһ кенә.

Таңһчин эмнлһнә өөнд нерәдгдсн байрин керг-үүлдврт орлцачнр хург эклхәс урд «Елка желаний» гидг акцд орлцад, Киитн аавд бичг бичсн психоневрологическ гер-интернатын күүкд-көвүдин санаһинь күцәҗ белг белглв. Тиим буйнч седклин кергәр байрин хург эклв. Таңһчин эмнлһнә көдләчнриг өөнләнь йөрәхәр кесг гиичнр ирв, энд олн җилдән көдлҗ йовсн ветеранмуд бас орлцв.

Хальмг Таңһчин Толһачин Һардврин ахлачин дарук Тарбан Савар эмнлһнә көдләчнр үнн-чик седклтәһәр көдлҗ, әмтнә әм аврхин төлә арһ-чидлән нөөлго үүлдҗәхиг темдглв. Нег үлү пандемий учрсн цагт цуһар ик даавртаһар күнд бәәдлд көдлсиг онц заав. Өөнлә ирлцүләд, олн җилдән эмнлһнд көдлҗәдг Коокун Геннадий Әрәсән эрүл-менд харлһна министерствин Күндллһнә һашгар, эмч Хулхачин Николай, медицинск эгчнр Лиҗин Галина болн Татьяна Репях, рентгенлаборант Харайкина Валентина болн Бабаева Валентина «Хальмг Таңһчин эрүл-менд харлһнд тәвцән орулсн төләдән» гидг темдгәр ачлгдв. Савар Викторович эднд өөдән ачлвринь бәрүлҗ өгв.

Хальмг Таңһчин Улсин Хуралын (Парламентин) Ахлач Анатолий Козачко, таңһчин эрүл-менд харлһна министр Булат Сараев, Элст балһсна залврин толһачин дарук Дмитрий Довгополов, таңһчин эрүл-менд харлһна көдләчнрин профсоюзин ахлач Евгения Манжикова йөрәлин үг келҗ, олн җилдән эмнлһнд көдлҗ йовх көдләчнриг бас ачлв. Тер мет таңһчин эмнлһнә 120 җилин өөнд нерәдгдҗ әңгүд дунд зарлгдсн марһана аш диглгдв. Энүнә ашар травматологическ болн гүн шинҗллтин әңгүд дииләчнр болв.

Эн җил түрүн болҗ «П.П.Жемчуевин нертә таңһчин эмнлһнд эрдмдән итклтә» гидг номинац зарлгдв. Эмнлһнә ах эмч Александр Калаев эн ачлвриг Увшин Марияд, Бедеша Екатеринад, Хоньна Валерийд болн Онҗана Надеждад бәрүлҗ өгәд, мана орн-нутгин федеральн клиникүдин һардвр болн көдләчнр тана тускар өөдән мергҗлттә болн ик дамшлтта эмчнр болнат гиҗ темдглҗәхинь заав. Иим көдләчнр бахмҗ болҗ, цааранднь чигн күцәмҗтәһәр үүлдҗ йовхиг дурдҗанав, гиҗ Александр Александрович келв.

Таңһчин билгтнр өөнин байрт орлцҗ, ду-бииһәрн эмнлһнә көдләчнриг йөрәснь эднд ик сергмҗ үүдәв.

БАТАН Сәәхлә
ЗУРГТ: П.Жемчуевин нертә таңһчин эмнлһнә ах эмч Александр Калаев ветеранмудла хамдан

Видео