Цусан өгчәх улсин то өсчәнә

19-01-2023, 12:50 | Общество

Эврә сән дурар цусан өгдг улс күнд гемтә болн зеткрлә харһсн улсин әм аврҗ, бачм бәәдл тогтхла дарунь дөңгән күргхдән белн болна. Кенд эднә цусн керглгдсиг эдн медхш, болв тер бийнь эдн эн әрүн чинртә керг күцәҗ, түрүн дуудврар цусан өгнә. Сүл цагт мана таңһчд донорск җисән сән делгрлт авчана. Олн җилдән цусан өгчәдг улсин зергләнд баһчудын то өсчәхнь темдгтә.

Давсн җилин чилгчәр «Цус гүүлгдг төв» гидг бүрдәц «Әм аврхд дөң бол» гидг керг-үүлдвр бүрдәҗ, таңһчин райодар одв. Элст балһснд бас эн керг-үүлдвр бүрдәгдв. Район болһнд мобильн станцин машид күрәд, цусна көрңгиг шинрүлв. Келхд, район болһнд зу һар күн орлцад, олн җилдән цусан өгчәх улсла хамдан донормудын тоод орв. Тиигәд, Үстин районд эн керг-үүлдврин йовудт 130 күн цусан өгв. Тедн дунд района эмнлһнә ах эмч Бокуша Игорь билә, эн олн җилин эргцд эврә сән дурар цусан өгч дамшлтта донор болна. Авъяст тохрсар МЧС-ин, МВД-н көдләчнр бас цусан өгч, әмтнә әм аврлһнд тәвцән орулна. Тегәд эн керг-үүлдвр зарлгдсиг медәд, Хальмг Таңһчар үүлддг Әрәсән МЧС-ин заллтын 100 көдләч цусан өгхәр ирв. Эднә цусн шишлң цергә керг-үүлдврт орлцҗах цергчнрт йовулгдхнь эднд хойр дам дааврта болв.

Б.Б.Городовиковин нертә Хальмг ик сурһулин оютнр эн буйнч седклтә керг-үүлдврт бас шунмһаһар орлцв гиҗ келх кергтә. Зәрм оютнр түрүн болҗ цусан өгхәр ирв. Цеднә Александран келсәр, хамдан сурчадг күүкдлә цусан өгхәр ирв. Эднә цусн күнд гемтә улст керглгдхнь эднд ик бахмҗ үүдәв, тегәд эдн цааранднь донормудын тоод орхар шиидв. Ик сурһулин баһчудын керг-төрин заллтын һардач Нәдвдә Цецн болхла 2011-ч җиләс авн цусан өгчәнә. Энүнә тоолврар, күнд бәәдлд туссн улст эрк биш дөң болх кергтә. Арвн һар җилин эргцд эн кесг дәкҗ цусан өгв, тегәд кедү күүнд тернь әм аврсиг тоолх керг уга гиҗ сангдна.

Келхд, дөч һар дәкҗ цусан өгсн улс Әрәсән ачта донорин нер зүүнә. Сүл кесн то-дигәр, мана таңһчд миңһн һар күн тиим нертә болна. Давсн җилд мана таңһчд 46 күн тиим өөдән нер зүүв, тедн дунд олн зүсн эрдмәр көдлдг улс билә. Ик Буурла районд бәәдг Мучкан Анатолий дөчн җил хооран күнд шав авсмн, тер цагт энүнд кесг күн цусан өгв. Эдгснә хөөн залу күн талдан улст дөң күргхәр донор болхар шиидв. Сарпан района Аршан Зелмн селәнд бәәдг Санҗин Любовин цуснь ховр, тегәд эн олн җилдән донор болҗ әмтнд дөң болна.

Цус гүүлгдг төвин ах эмч Уташа Санҗин келсәр, таңһчд донормудын то өсчәхнь темдгтә. Сән дурар цусан өгчәх улс дунд баһчуд олн бәәхнь нег үлү байрта болна, юңгад гихлә эдн чик авг-бәрцәр бәәҗ, эрүл-мендин бәәдлән бүрткҗ кесг күүнд тусан күргнә.

Зургт: «Әм аврхд дөң бол»
гидг керг-үүлдврт орлцачнр
цусан өгчәх кем

Видео