Селәнә улст түрүн дөң күргнә

11-02-2023, 11:47 | Общество

Давсн җилин чилгчәр Хальмг Таңһчин Толһач Хаска Бату шуд залһлдана эв-арһар әмтнә сурврмудт хәрү өгсн билә. Таңһчин улс эдниг үүмүлҗәх олн зүсн төрмүдәр цәәлһвр өгхиг сурҗ, тедниг хаһлхд дөң болхиг сурсмн. Үстин района Харба селәнә бәәрн улс ФАП-д фельдшер уга, түрүн дөң күргдг мергҗлт кергтә гисн төр босхла. Хальмг Таңһчин эрүл-менд харлһна министерствин зәңглсәр, эн җилин туула сарин 11-с авн Харба селәнә ФАП-д Манҗин Анастасия (зургт) «Земск фельдшер» гидг шаңһа көтлврин медлд күч-көлснә хаалһан эклв.

Манҗин Анастасия нидн зунар Т.Хахлынован нертә медицинск колледж төгсәв. Бийнь эн Элст балһснд өсәд-боссмн, болв хәрд һарад, авальтаһан Үстин района Харба селәнд нүүв. Тенд авальнь селәнә эдл-ахун халхд көдлҗәнә. Эдниг нааран нүүҗ ирхд селәнд фельдшер билә, болв намрар залу күн шишлң цергә керг-үүлдврт эврә сән дурар орлцхар бооца батлад, көдлмшәсн һарв. Тегәд намрас авн ФАП-д дунд медицинск көдләч уга бәәсмн. Хам-хоша бәәдг Бергин селәнәс эмч Очра Тамара болн медицинск эгч Нарана Валентина долан хонг болһн ирәд, бәәрн улсин эрүл-менд шинҗлҗ, дөң болна.

– Селәнә улс намаг медицинск эгчин эрдмтә болҗахиг медәд, бәәрн ФАП-д көдлх үрвр кев. Тегәд би эн җиләс авн энд күч-көлснә хаалһан эклсм тер. Бидн өрк-бүләрн нааран нүүҗ ирвидн, хө мөстә Мария-Дарим күүкмдн бичкдүдин садт орна. «Земск фельдшер» гидг көтлврин медлд би бооца батлад, энд ФАП-д көдлҗәнәв. Района эмнлһнә болн Харба селәнә муниципальн бүрдәцин һардвр, ах үүрмүд нанд дөңгән күргнә. Бергин селәнәс ирдг эмч Тамара Нюдяевна ах улсин эрүл-менд харна, эн сүв-селвгән өгч, дамшлтарн хувалцҗ, ямр нег төр учрхла цугинь зааҗ өгнә. Валентина Книмаевна болхла бичкдүдин эрүл-менд шинҗлнә, эн дунд сурһульд болн бичкдүдин садт ордг күүкд-көвүдт ямаран тәрлһ кехинь диглнә. Селәнд 2016-ч җилд модульн ФАП тосхгдв, тегәд энд эмнлһ кех, эрүл-мендин бәәдл шинҗлх цуг таал бәәнә. Эмч гемтә улст ямаран эмнлһн кергтәһинь диглнә, эдн нааран ирәд тәрлһ авна. Долан хонг болһн би Цаһан Амн селәнд одад, района эмнлһнд кергтә эм авнав. Селәнд нурһҗл медәтә улс бәәнә, кесгнь хуучта, тегәд дару-дарунь теднд одҗ түрүн дөңгән күргх кергтә болна, – гиҗ Анастасия Хонгоровна келв.

Эндр Харба селәнд һурвн зу һар күн бәәнә, эдл-ахун, дунд сурһуль болн бичкдүдин сад үүлднә. Өөрхн иргчдән ФАП-иг шишлң көлгн-күчәр теткхмн гиҗ күләгдҗәнә. Бийснь тас уга болсн улст Манҗин Анастасия түрүн дөң күргнә, эмч Очра Тамара теднә эрүл-менд шинҗлҗ, эмнлһнә туст сүв-севлг өгнә. Нидн сурһулян төгсәсн баахн мергҗлт күч-көлснә хаалһан шиңкән эклҗәдг болв чигн ах үүрмүдин дөң-тусар төлҗәд, дамшлт хоршаҗ авхнь маһд уга.
Бәәрн улсин келсәр, Манҗин Анастасия баахн болв чигн көдлмштән ик дааврта, һавшун, әмтнлә тевчңһү, күн болһнд килмҗән тусхаҗ цаһан седкләсн дөңгән күргхәр шунна. Һарнь җөөлн, тәрлһ кеснь медгдхш, тегәд әмтн эмнлһ авч ханлтан өргнә.

ДООҖАН Наталья

Видео