Ээҗнрин белг цергчнриг дулалх

11-02-2023, 18:36 | Общество

Төрскән харсачин Өдр угтҗ таңһчин әмтнә социальн теткврин комплексн төвмүд (КЦСОН) «Негдсн Әрәсә» партин «Ах үй» гидг төсвин медлд «Тепло для героя» гидг Цугәрәсән акцин йовудт шишлң цергә керг-үүлдврт орлцачнрт дулан хувц-хунр цуглулҗана, эднә хәләврт бәәдг медәтнр социальн көдләчнрлә хамдан өөмс болн беелә өлгҗәнә. Дәкәд ах үйин улс цергчнрт бүлән үгән нерәдҗ бичгүд бичҗәнә, зәрмснь болхла видео цокҗ авад, халун менд илгәҗәнә. Бийснь җирһлин хаалһд дәәнә болн тууврин түрү-зүдү болн зовлң үзссн медәтнр цергә даалһвр күцәҗ йовх улст иим күнд цагла бүлән үг ик урмд өгдгиг сәәнәр меднә.

Көтчнрә района КЦСОН-а һардач Мацга Татьяна келсәр, күч-көлсч коллективс, сурһуль-эрдмин бүрдәцсин көдләчнр болн сурһульчнр, арһлачнр, селәнә эдл-ахусин элчнр буйнч седклин керг-үүлдврт шунмһаһар орлцҗ, цергчнрт хувц, хот-хол, эм, нань чигн кергтә кегдлмүд авч ирнә. Районд үүлддг штабд цергчнрт илгәц белдҗ цааранднь терүг йовулна. Района сурһульчнр Төрскән харсачин Өдрт нерәдҗ шишлң цергә керг-үүлдврт орлцачнрт йөрәлин үгән бичҗ бичгүд авч ирв. Социальн көдләчнр сул цаг олҗ цергчнрт дулан өөмс өлгсн деерән эднә хәләврт бәәдг медәтнрт дөңгән күргнә. Тиигәд эдн хамдан үүл бәрҗ, цаган тустаһар давулна. Социальн көдләчнр Җачан Надежда, Борлга Гилән, Мөңкән Валентина, Улян Булһн цергчнрт дулан өөмс өлгҗ белдв. Чкаловский селәнд бәәдг медәт Александра Цереновна Сангаджиева өөмс өлгсн цагтан цергчнрин тускар ухалҗ, эдн цуһар эрүл-менд бәәҗ, бүрн-бүтн хәрҗ иртхә гиҗ дотран зальврв. Дал һарсн медәт бичкндк цагтан өрк-бүлтәһән тууврт тусҗ, ик зовлң үзсмн, гертәсн хол йовх цергчнрт седклнь зовҗ, эн цаһан седкләсн белгән нерәдв. «Мана көвүд даалһвран үнн кевәр күцәҗ, эрүл-менд хәрҗ иртхә. Эднд нерәдҗ өөмс өлгсн цагтан баһ цаган тодлад, мана эцкнр дәәнә цагт залу-зөрмгән үзүлҗ, диилвр бәрсиг санад, эндр шишлң цергә керг-үүлдврт орлцҗах цергчнр аавнриннь нериг өөдән бәрҗ йовтха гиҗ дурдв. Таңһчин район болһнд эн буйнч седклин кергт медәтнр орлцҗахиг соңслав, тегәд ээҗнрин һарар өлгсн кегдлмүд мана цергчнриг киитнәс харсҗ дулалҗ йовтха», – гиҗ Александра Цереновна келв.

Целинн района әмтн шишлң цергә керг-үүлдвр эклснәс авн волонтерск штаб бүрдәҗ, цергә даалһвр күцәҗ йовх нег һазра улсиг дөңхәр буйнч седклин керг-үүлдврмүд бас бүрдәнә. Района комплексн төвин социальн көдләчнр эднә хәләврт бәәдг медәтнрлә хамдан бас дулан хувц-хунр өлгҗәнә, эс гиҗ цуглулсн мөңгәр терүг хулдҗ авна. Социальн көдләчнр һарин эрдмин клуб бүрдәҗ, көдлмшиннь хөөн өөмс өлгнә. Медәтнр Хахлина Галина Оватаһас, Көкән Екатерина Найнтахнас, Линкован Таисия Хар Булгас, Бабенкон Лидия, болн Вальшинан Алевтина Вознесеновкас, Шоголован Меля Деед Яшкуляс, болн нань талдан селәдт бәәдг ээҗнр цергчнрт дулан белг белдв. Эднә өлгмр кегдлмүдин түрүн илгәц цергчнрт йовулгдсн бәәнә. Вознесеновка селәнд бәәдг най һарсн ээҗ Лидия Ивановна Бабенко зөвәр наста болв чигн заглюн, эн бийнь гер дотр цугинь кенә, һуйрин зүүтә кегдлмүд болһхдан дурта. Урднь эн бәәрн «Сударушка» ансамбльд орҗ, билг-эрдмәрн әмтнд байр үүдәдг бәәсмн. Эн селәнд бас бәәдг Алевтина Васильевна Вальшина болхла дулан өөмс өлгсн деерән цергчнрт видео цокҗ авад, төрскн һазраснь халун менд келүлв. Эн ээҗнр дәәнә цагин күчр-күндиг дааҗ, хөөннь селән һазрт көдлҗ йовсмн.

Нидн «Негдсн Әрәсә» партин «Ах үй» гидг төсвин медлд давулгдсн «Ээҗин килмҗ» гидг керг-үүлдврин йовудт медәтнр Донбассин әмтнә төлә дулан өлгмр кегдлмүд белдсн билә. Мана орн-нутгин 40 региона элчнр терүнд орлцҗ, Луганск болн Донецк олн-әмтнә республикүдин әмтнд 40 миңһ һар кегдл йовулла. Ода болхла мана цаһан седклтә ээҗнр шишлң цергә керг-үүлдврт орлцачнрт дулан белгән нерәдҗ, Төрскән харсачин Өдрлә йөрәҗәнә.

ДООҖАН Наталья
Зургт: медәт Саңһҗин Александра болн социальн көдләч Җачан Надежда цергчнрт өөмс өлгҗәнә

Видео