Мал өсклһнд немр хот олзлҗана

16-02-2023, 22:44 | Общество

Өдгә амр биш цагт мана орн-нутгт тогтсн бәәдләс иштә селәнә эдл-ахун халхар эдл-ууш һарһдг арһлачнр нег һазра улсиг эврәннь хот-хоолар теткхәр шунна.

Мана орн-нутгт, нег үлү Хальмг Таңһчд селәнә эдл-ахун халх экономикин делгрлтд ик тәвцән орулҗахнь лавта. Селәнә эдл-ахун регион болсн төләдән мана таңһч нүүрләчнрин тоод йовна. Эн нерән геелго, АПК-н халхиг цааранднь делгрүлхин төлә өдгә цагин некврлә ирлцҗәдг эв-арһс олзлх кергтә. Шидр Приютна района «Уралан» агрофирмд асргдҗадг бод малын теҗәлд «Сатуран J» нертә немр хот олзлдг болв. Эннь юуһарн өвәрц гиҗ келхлә, энүнә тогтацд йод орна. Йод малд туста болна. Терүнәс нань «Сатуран J» немр хотар малыг бордхла махнь шимтә болна, гиҗ мергҗлтнр келнә.

Мана регионд бәәрн улст чигн йод бас кергтә болна. Тегәд эн немр хотыг мал өсклһнд олзлхла аш сүүлднь әмтнә эрүл-мендин бәәдлд бас туслхмн. Хальмг Таңһчд «Сатуран J» өргнәр олзлад, эн немр хотыг эврән һарһад, хөөннь Әрәсән Өмн үзгин регионмудт, цааранднь Көк теңгсәр бәәршлҗәдг орн-нутгудар илгәхәр зуралҗана.

Эн немр хотыг Сиврин болн Уралын регионмудт күцәмҗтәһәр олзлв. Тенд шинҗллһнә йовудт селәнә эдл-ахус сән күцәмҗ бәрв. Саалин үкрмүд дала үс өгдг болв, туһлмудын чинәнь сән болв. Өдгә цагт иим чинртә талдан немр хот уга. Энүг ямр чигн хотд орулҗ, шалдрң эмлә чигн хутхҗ малд өгч болна.

Приютна района «Уралан» агрофирмд бордлһнд бәәдг үкрмүдин төлә «Сатуран J» хотыг яһҗ олзлҗахин тускар Хальмг Таңһчин селәнә эдл-ахун министрин дарук Николай Абушинов келҗ өгв. «Эндр мана таңһчд «Уралан» агрофирмд асргдҗадг малын то зөвәр ик. Эн эдл-ахуд хотднь «Сатуран J» немәд асрҗадг малыг зурһан-йисн сарин чилгчәр шинҗлҗ болхмн. Бод малыг чиңнүрдәд ашнь ямр болхинь медхвидн», – гиҗ Николай Алексеевич цәәлһв.

«Уралан» агрофирмин һардач Сулейман Махдиевин келсәр болхла, сар болһн бод малын чиңнүринь медҗ шинҗллт кенә. Шишлң кергслд «Сатуран J» йирин хотта хутхад арвн грамм немр хот үкр болһнд өгнәвидн. Цаг давад ашнь медгдх гив.

Эн немр хот олзлхла ветеринармудын көдлмш баһрх, гиҗ селәнә эдл-ахун көдләчнр келнә. Малын хотд йод орулхла, чинәнь сән болад, мал сәәнәр ясрна.

КАРСАНА Евгения

Видео