Дурта көдлмшнь урмд өгнә

16-02-2023, 22:57 | Общество

Эн җил МВД-н даалһсн участкин көдләчнр эднә цергллт бүрдснәс авн зун җилин өөнән темдглҗәнә. Ямаран чигн әәмшгтә эс гиҗ зеткртә йовдл учрхла бидн түрүн болҗ полицин, нег үлү бәәдг уульнцин даалһсн әңгин көдләчнрт җиңнүлҗ эднәс нөкд болхиг сурнавидн. Өдр болһн эдн даалһсн участкин хайгудар йовҗ, эк-эцкнь үрдән мууһар асрад, му таалд бәәсн гер-бүүрнь шинҗлнә. Терүнәс нань әср, зөв-йос эвдсн улсиг бас йовҗ хәләнә.

Целинн района Троицкое селәнд ах лейтенант Евгений Сюкиев 5-ч тойгта әңгин дааврта көдләчәр церглнә. Евгений Лагань балһснд өсч-боссн көвүн болна. Бичкндк цагасн авн бөк бәрлдәнд, футбол наадхдан дурта болҗ өсв. Дотр-дундын органмудт Хальмг ик сурһуль төгсәснә хөөн ирҗ экләд көдлв. Тер цагас арвн һурвн җил давв. Күч-көлснә хаалһан Е.Сюкиев Элст балһсна УВД-н ППС-т эклсн болдг. Эн цергллтд көдләд, баһчуд дунд болдг кесг ноолдаг хөрҗ, өдр болһн балһсна иргнмүдт әәмшг уга бәәдл тогталһнд орлцҗ дамшлтан хоршав. Полицин көдлмшт түрүн ишкдлән кехд нанд ах үйин көдләчнр дааврта цергллтин тускар цәәлһҗ, сүв-селвгән өгч, дамшлтарн хувалцҗ нөкд болла, теднд би даңгин ханлтта бәәнәв, гиҗ ах лейтенант Сюкиев келнә. Хөөннь Евгений Целинн района цаг зуур бәрдг изоляторт, Элстин насни дигт күрәд уга арвтнрла көдлдг әңгд церглв. Җил ирвәс полицин кесг әңгд көдлҗ, ах мергҗлтнрәс үлгүр, медрл авч дамшлтан хоршасн болдг.

2022-ч җилин ноха сарас авн Целинн района Троицкое селәнә 5-ч тойгта әңгин дааврта көдләчәр экләд көдлв. Энд җил шаху церглсн бийнь хамдан көдлҗәдг улсин дунд күндллһ болн тоомср олв гиҗ темдглх кергтә. Ах лейтенант Сюкиевд даалһсн уульнцс селәнә хамгин ик әңгин тоод орна. Эннь Партизанск, Колхозная, Э.Деликовин, В.Хомутниковин, Ю.Клыковин, ах-дү Алехинихнә нертә болн талдан уульнцс мөн.

Ямр чигн көдлмш эврә өвәрцтә болдг. Нег дәкҗ геедрсн көвүг һурвн өдртән хәәһәд, идхән-уухан мартад көдлвидн. Мана хөвәр арвт эрүл-менд олдв. Би һурвн үртә эцк болсн төләдән, эн көвүг хәәсн йовудт икәр зовад бәвв. Эк-эцкләнь эндр күртл залһлда бәрҗ бәәнәвидн, гиҗ Евгений темдглнә.

Көдлмшин халхар Е.Сюкиев Ар Кавказд кесг дәкҗ одв, тер тоод Осетин болн Ингушетин хоорндк хәрлцәг тогтнулһнд бас орлцв. Командировкст орлцад ончрсн төләднь «За отличие в службе III степени» болн «За службу на территории Северного Кавказа» медальмудар ачлгдв.

Дааврта болн күнд үүлдвртнь энүг өөрхн улснь даңгин дөңннә. Евгений Анна авальтаһан хамдан хойр күүк болн көвү өскчәнә. Анна өрк-бүлин һулмтыг әрүнәр хадһлна болн мана һоллгч түшг болна, гиҗ дурта авалиннь тускар герин эзн келнә. Полицин көдләчин аваль гисн шишлң эрдм гиҗ келҗ болхмн, юңгад гихлә эн көдлмштән даңгин сө күртл бәәнә. Авальнь болхла үрдән хәләһәд, сенр хотан чанад, герин эдл-ахун цуг көдлмш энүнә һартнь бәәнә гиҗ келх кергтә. Эңкр авальдан би даңгин ханлтта бәәнәв, гиҗ Е.Сюкиев онц темдглв. Анна Сюкиеван келсәр, Евгений ямр чигн кергиг даавртаһар күцәнә, дәкәд болхла көдлмшәсн асхн ора муурад ирвчн үрдтән эрк биш оньган өгч, эднән соңсҗ, эцкин сүв-селвгән өгнә.

Тааста көдлмш, дурта өөрхн улс цааранднь седклән тәвҗ көдлхд, нанд урмд өгнә, гиҗ ах лейтенант Сюкиев иткүлв.

КАРСАНА Евгения

Видео