Цергчнриг дөңнх Саң бүрдәгдв

06-04-2023, 08:00 | Общество

Шидр Әрәсән Президент Владимир Путин шишлң цергә керг-үүлдврт орлцачнриг болн теднә өрк-бүлмүдиг дөңнлһнә «Төрскән харсачнр» гидг шаңһа саң бүрдәлһнә туск Зәрлг батлв. «Шишлң цергә керг-үүлдврт орлцачнрин, наадк улсин болн теднә өрк-бүлмүдин гешүдин җирһлин сән таал болн шунмһа үүлдвр теткхин төлә «Төрскән харсачнр» гидг шаңһа саң бүрдәлһн эркн чинртә гиҗ тоолҗанав», гиҗ Зәрлгт келгдҗәнә.

Саңгас дөң күргх улсин тоод 2014-ч җилин хөн сарин 11-ас авн цергә керг-үүлдврт орлцҗадг Донецк болн Луганск улсин Республикүдин цергә бүрдәцсин орлцачнр бас орв. Саңгин үүлдвриг шинҗллһнә Хүүв һардхмн, терүнә ахлачд орн-нутгин Президентин һардврин негдгч дарук Сергей Кириенко батлгдв.

Әрәсән Президент регионмудын толһачнрт саңгин үүлдвриг дөңнхиг даалһв. Келхд, Әрәсән Президент Федеральн Хургт Илгәвр кеснә дару мана таңһчд СВО-д орлцачнриг болн теднә өрк-бүлмүдиг дөңнлһнә шаңһа саңгин әңг бүрдәлһнә керг-үүлдврмүд эклсн билә. Одахн Хальмг Таңһчин Толһач Хаска Батун даалһврар таңһчин залврин Ахлачин дарук- таңһчин социальн делгрлтин, күч-көлснә болн көдлмшәр тетклһнә министр Өлзәтин Марина шишлң цергә керг-үүлдврт орлцачнриг дөңнлһнә шаңһа саңгин үүлдврин төрмүдин комиссин сүүр давулв. Терүнд «Зәрм иргнмүдт немр социальн дөң күрглһнә тускар» гидг таңһчин зака күцәлһнә туст эрүл-менд харлһна болн сурһуль-эрдмин халхар күцәгдх керг-үүлдврмүдин, ведомствс хоорндк хәрлцәнә төрмүд босхгдв. Комиссин сүүрин ашар социальн зүүцүләчнриг батлҗ авлһна, шаңһа саңгин әңг бәәршлх бәәр йилһҗ авлһна туст сүв-селвг орулгдв.

ДООҖАН Наталья

Видео