Чик авг-бәрц батрулна

06-04-2023, 19:23 | Общество

Чик авг-бәрцәр бәәдг, цогц-махмудан батрулҗ спортар соньмсдг улсин эрүлменд бат болдгнь мөн. Өрүн босад, махмудан тинилһәд, зарядк кесн күн өдрин
йовудт чаңһ-чиирг бәәҗ, муурхан медхш. Нег үлү ачта амрлһнд һарсн медәтә
улст өдр болһн цогц-махмудан батрулҗ, чик авг-бәрцәр бәәхнь туста болна. Тиигәд әмтнә социальн теткврин комплексн төвмүдин медлд ах үйин улсин төлә
эрүл-мендин болн чик авг-бәрцин клубмуд бүрдәгдв. Терүнд ордг аав-ээҗнр хамдан цаган тустаһар давулҗ, спортар соньмсна, чик авг-бәрцин болн эрүл-менд
батруллһна тускар күүнднә.

Көтчнрә КЦСОН-а медлд һурвн җил хооран «Эрүл-менд» гидг клуб секгдв, терүнд ах үйин улс орад, чик авг-бәрц батруллһна керг-үүлдврмүдт орлцдг болв. Социальн көдләчнр медәтнрлә хамдан стадионд цогц-махмудан батрулҗ, скандинавск йовлһар соньмсна, велосипед унҗ уульнцар йовна эс гиҗ кеер һарна. Тиигәд, эдн «10 миңһн ишкдл эрүл-менд күртл» гидг керг-үүлдврт орлцхдан таасв. Зәрм медәтнр биидән скандинавск йовлһна төлә керглгддг шишлң эв-арһс хулдҗ авад, өдр болһн гилтә йовһар йовна. Келхд, тиим йовлһн зүркнә-судцна систем батрулҗ, олн зүсн гемәс саглна гиҗ эмчнр темдглнә. Дәкәд медәтнр баһ цаган тодлад, велосипедар кеер һархдан дурта болна.
Района комплексн төвин медәтнрин болн гемтә-шалтгта улсин социальн теткврин әңгин һардач Васькан Светланан келсәр, медәтнр хамдан цаган давулхдан таасна. Ачта амрлһндан һарсн цагтан күүкдтән болн ачнр-зеенртән түшг болхин төлә эдн чик авг-бәрцәр бәәҗ ут нас наслх күсл тәвнә. Ямана Елена, Давашкина Наталья, Бурина Надежда, Шонхра Надежда, Сучина Эльзәтә « Эрүл-менд» гидг клубин үүлдврт шунмһаһар орлцна. КЦСОН-а медлд цогц-махмудан батруллһна тамрин кергслмүд (тренажеры) бәәнә, тегәд медәтнр терүг олзлҗ чадна. Дәкәд төвин медлд техническ олн зүсн эв-арһсиг цаг зуур олзллһнд авх арһ бәәнә.
Хөөннь төвин медлд «Сувсн» гидг клуб бүрдәгдв. Района селән болһнд үүлддг социальн көдләчнр эн клубмудын ханьд медәтә улсин төлә олн зүсн керг-үүлдвр бүрдәнә. Селәдин муниципальн бүрдәцсин болн сойлын гермүдин көдләчнр ах үйин улсин төлә керг-үүлдврмүд бүрдәлһнд дөң-тусан күргнә. Тиигәд, көгҗмин сурһулин багш Кунгарина Наталья медәтнрлә «вокало-терапия» гидг соньн кичәл давулна. Аав-ээҗнр багшла хамдан дуд дуулҗ, кииһин гимнастик кенә. Района ДЮСШ-н багшнр болхла спортивн керг-үүлдврмүд давуллһнд дөңгән күргнә. Төрскән харсачин болн күүкд улсин сән өдрмүдт, Цаһан сар болн Масленица байрт нерәдҗ шатрар болн дөөвәр марһас болна.
– Медәтә улс ут нас наслҗ удан цагтан эрүл-менд бәәхин төлә мана төвин улд үүлдҗәдг клубмуд «Ах үй» гидг федеральн төвин медлд олн зүсн керг-үүлдвр бүрдәнә. Мана аав-ээҗнр спортивн марһаст орлцна, цогц-махмудан батрулна, билг-эрдмән үзүлнә. Ода деерән 35 күн эн клубмудын үүлдврт шунмһаһар орлцна. Социальн көдләчнр медәтнрин эрүл-менд батруллһна төрт ик оньг тусхаҗ, эднә төлә эмчнрлә харһлт бүрдәнә. Эрүл-менд харлһна көдләчнр чик авг-бәрцин, олн зүсн гемәс саглуллһна төрмүдәр күүндвр тогтана. Тиим кевәр мана аав-ээҗнр цаган тустаһар болн сергмҗтәһәр давулҗ, бииснь чик авг-бәрцәр соньмссн деерән ачнр-зеенртән үлгүр болна, – гиҗ Светлана Владимировна келнә.

ДООҖАН Наталья
ЗУРГТ: Көтчнрә медәтнр
цогц-махмудан батрулҗана

Видео