Өрк-бүлин оруһинь икдүлнә

11-03-2023, 19:31 | Общество

Эн җил җирһлин күнд таалд туссн әмтн социальн бооца батлҗ, шаңһас дем авч өрк-бүлиннь олз-ору икдүлҗ чадҗана. Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан темдглсәр, җил ирвәс шаңһас дөң авсн улсин то икдәд йовна.

– 2021-ч җилд социальн бооца батллһнд 74 сай арслң йилһсн болхла, давсн җилд эн кергт 104 сай арслң һарһгдв. Эн җил социальн бооца батлх улст 109 сай арслң йилһҗ, күнд таалас һархин төлә эврә керг, онц эдл-аху бүрдәлһнд, өрк-бүлин нань чигн төрмүд хаһллһнд дөң болхмн. Социальн бооцана көтлврт олз-орунь мана таңһчд батлгдсн сара хонга теҗәлин баһ кемҗәтә иргнмүд орлцҗ чадҗана. Эн кемҗән 13646 арслң болна. Әмтнә социальн харслтын цергллт өгдг демин мөңгнәс социальн бооцан юуһарн йилһрнә гихлә, энтн шаңһас дем авчах күүнә болн социальн харслтын цергллт хоорнд батлгдҗадг бооцан болна. Социальн бооцаһар җирһлин күнд таалд туссн иргн олз-оруһан икдүлҗ чадҗана, – гиҗ Марина Петровна цәәлһв.
Социальн бооцаһар йилһгдҗәдг мөңгиг дөрвн зөрүллтәр олзлҗ болна. Хамгин түрүнд эн дем көдлмш олҗ авхд туслна. Көдлмш олҗ авсн улс түрүн сард 14885 арслң авна, хөөтк һурвн сарин эргцд иим демин мөңг бас авна. Тер мет эн цагт иргн мергҗлтән өөдлүлҗ шин эрдм дасхар шиидхлә, терүнд сар болһн эн социальн демин өрәлинь бас өгдг болхмн. Давсн җилд мана таңһчд 200 күн көдлмш олҗ авад, эн социальн дем авсн билә.
Дәкәд социальн бооца батлсн иргн арһлач болҗ үүлдҗ, тааста керг бүтәҗ чадҗана. Терүнә төлә көдлмш уга күн бизнес-зура белдҗ, шаңһа 350 миңһн арслң дем олзлҗ кергән эклх арһта болна. Селән һазрт бәәдг улст дөңцл эдл-аху бүрдәҗ мал асрлһнд 200 миңһн арслңга дем өгнә. Эн дем олзлҗ мал асрҗ өрк-бүлиннь теҗәл икдүлсн улс баһ биш бәәнә. Эдн нурһлҗ олн үртә өрк-бүлмүд болна, тегәд эдн бийсән үсәр, махар, тосар, өндгәр теткдг болв. Дөрвдгч зөрүллтәр социальн бооцана көтлврт орлцачнр социальн дем авч күнд бәәдләс һархин төлә дем авна. Эн мөңгиг эдн өрк-бүлднь кергтә хувц-хунр, хот-хол болн нань чигн тоот хулдҗ авхд олзлна. Министрин темдглсәр, шишлң комиссь өрк-бүлин гербүүрин таалынь шинҗлснә хөөн эн социальн дем өгхин туст шиидвр батлна.
2021-ч җилд мана таңһчд 629 күн социальн бооца батлсн болхла, нидн терүнә то 660 болв. Эн көтлврт орлцсн улс нурһлҗ эврә керг бүтәхәр шунна. Тиигәд, давсн җилд 251 күн эн халхар мөңгән олзлҗ, эврә кергән бүтәҗ олзта-орутаһар үүлдсн деерән талдан улсиг көдлмшәр теткснь темдгтә. Мана таңһчин әмтн юн уйдг мастерской, лавк, үсән ясад кирһлһнә, мебель кеҗ һарһлһна, һаңначин болн көлгн-күч ясдг туслмҗ күрглһнә халхар кергән бүтәв. Эн җил 579 күн социальн бооца батлхмн гиҗ зуралгдҗана, эн кергт шаңһас кергтә мөңгн йилһгдхмн.

ДООҖАН Наталья

Видео