Үр-иньгүдин харһлт

16-03-2023, 19:36 | Общество

Давсн амрлһна өдрмүдт нүднә харань тату улсин Әрәсән ниицәнә (ВОС) Хальмг Таңһчар үүлддг региональн әңгин Элстин бүрдәцин һардврин седвәрәр буйнч седклин харһлт бүрдәгдв. Төрскән харсачин болн күүкд улсин сән өдрмүдт нерәдгдсн харһлтд 25 күн орлцад, цаган сергмҗтәһәр давулв.

Элстин бүрдәцин ханьд хотл балһснд, Үстин, Ик Буурла, Целинн болн Яшкулин райодт бәәдг гемтә-шалтгта улс орна. Ут тоодан 205 күн олна ниицәнә гешүн болна. Эн җиләс авн Элстин бүрдәцин ахлачд Бимбән Александр суңһгдв. Александр Мутлаевич тавн җил хооран ахлачин үүл дааҗ йовсн билә, тегәд олна ниицәнә үүлдвр бүрдәлһнә туст дамшлт бәәнә.
Бимбән Александр әәрмд церглҗәсн цагтан күндәр шавтад, эрмдгтә болв. Баһ-дүүвр настадан эн сохрв. Цергт мордхиннь өмн эн Элстд көлгн-күчнә болн хаалһин училищд сурад, тоочин эрдмтә болсмн. Гемтә-шалтгта болсн бийнь эн олна үүлдврт орлцад, талдан улст туста болхар зүткҗәхнь темдгтә. Олна бүрдәцин үүлдврт энүнд сегләтр Санкун Виктория дөң болна, эн олн зүсн цаас, бичг диглҗ, керг-үүлдврмүд бүрдәлһнә болн нань чигн төрмүд хаһлна. Тиигәд, эн харһлт бүрдәхин төлә эдн хотл балһснд үүлддг арһлачнрт бичг бичәд, дем күргхиг сурсн билә.
Харһлтд орлцсн улс нег-негән байртаһар тосад, бәәдл-җирһлиннь тускар соньмсад, сүл зәңгәрн хувалцв. Бидн эднлә бас күүндәд, олна бүрдәц ямаран керг-үүлдврмүд давулдгин тускар, эднә төрмүд хаһллһнд ямаран дөң күргдгин тускар хувалцхинь сурвидн. Эднә келсәр, нүднә харань тату улсин төлә шатрин, дөөвин марһас, билг-эрдмин наадм болн нань чигн керг-үүлдврмүд болна. Буйнч седклтә улсин демәр болн дөң-тусар иим харһлтс бас бүрдәгднә, хот-хоолар теткнә. Нег үлү пандемий учрсн цагт эрмдгтә улст буйнч седклтә улс оньган тусхаҗ, эдниг мартсмн уга. Дәкәд эдн Лаганя районд бадм цецгин наадмд, Әәдрхнә мүҗд Хошуда хурлд болн Богд уулд одсан тодлв.
Нохашкин Ольга өрк-бүлтәһән 1961-ч җилд Сиврәс хәрҗ ирв. Нааран ирснә дару арвн настадан эн гемнәд, нүднә харань муурв. 90-ч җилмүдт Элстд нүднә харань тату улсин төлә эврә бүрдәц секгдв, тенд эдниг көдлмшәр теткдг болв. Тиигәд эрмдгтә улс бөөрг кеҗ һарһдг цехд көдлҗ бийән даадг бәәсиг Ольга Цереновна тодлв. Очр-Һәрән Вера цехин үүлдвриг чадмг кевәр һарддг бәәсиг медәт ханлттаһар келнә. Залу улс болхла хадасна толһа болн гөлм кедг бәәсмн. Бичкн болв чигн эдн эврә бүрдәцд көдләд, җалв авдг бәәсмн. Казанцеван Байрта 1995-ч җиләс авн олна ниицәнә гешүн болна, эн бас баһ цагтан гөлм өлгдг цехд көдлдг бәәҗ. Келхд, энд эн Алексей авальтаһан таньлдад, өрк-бүлән өндәлһв. Эдн эн цехд арвн һар җилдән көдлв. Ангелина күүкнь Т.Хахлынован медколледжд сурчана, эн эк-эцкән хәләһәд дөң болна. Байрта берин келсәр, эдн өркбүләрн эрмдгтә улсин үүдәлтин наадмд орлцҗ, билг-эрдмән үзүлнә. Эндр иим харһлт бүрдәснд эдн ханлтан өргв.
Нүднә харань тату улсин ниицәнә Хальмг Таңһчар үүлддг региональн әңгин Элстин бүрдәцин ахлач Бимбән Александрин келсәр, эдн Диилврин Өдрт нерәдсн харһлт бас бүрдәхәр зуралҗана. Мөрн сард болх бамб цецгин наадмд бас орлцҗ хамдан сергмҗтәһәр амрх санан бәәнә. Нүднә харань тату улст дөң болдг шишлң мергҗлтиг сурһх төр хаһлхин төлә эдн ВОС-ин Хальмг Таңһчар үүлддг региональн әңгин дөңгәр коммерческ биш бүрдәцсин төсвсин марһанд орлцхар седҗәнә.
– Кех-күцәх көдлмш дала. Эн җилин зураһан батлад, бидн эрмдгтә улсин төлә нань чигн керг-үүлдврмүд бүрдәхвидн. Эрмдгтә улс хоорндан харһҗ, цаган тустаһар болн сергмҗтәһәр давулхин төлә иим харһлтс кергтә. Эндр маднд арһлач Лиҗәкә Светлана «Роял-парк» ресторанд харһлт давулхд дөңгән күргҗ, сенр хот-хоолар тоов. Бидн Светлана Ивановнад ик ханлтан өргҗ, кергнь делгрәд йовтха гиҗ дурдҗанавидн. Райодас ирсн эрмдгтә улст иим харһлт нег үлү сергмҗтә болна, – гиҗ Александр Мутлаевич келв.

ДООҖАН Наталья
ЗУРГТ: харһлтын кем Түүрвәчин цоксн зург

Видео