Зуульчнрт – өврмҗ, бәәрн улст – бахмҗ…

11-04-2023, 10:10 | Общество


Мана таңһчд хаврин кемд давулгддг бамб цецгин наадм цааранднь давҗана. Шидр Хар Һазра Адг селән наадмин гиичнрән тосв. Җил болһн давулгддг Бамб цецгин наадм Хальмг Таңһчин Толһач Хаска Батун зәрлгәр урдк җиләс авн сара хонгт давдг болв.

Адг селәнд ишкә гермүдәс хальмг хотн тогтв. Керг-үүлдврин эклцәр Хар Һазра района СМО-н болһна, тер мет Яшкулин района болн хам-хооша бәәдг Дагестан Республикин элчнр хальмг келн-улсин хувцта байрин йовлһнд орлцв.
Бемб өдрлә теңгрин бәәдл чигн туслв, нарта дулан өдр болв. Хар Һазра района сойлын коллективс сәәхн бииһәрн, торһа мет дуулсн дууһарн наадмин гиичнриг байрлулв. Селәнә эдл-ахун һәәхүлд үзүлгдсн хальмг тохма хөд района күцәмҗсин негнь болсинь ил медгдв. Наадмин йовудт көдлсн волонтермуд гиичнриг ишкә гер болһнар үдшәҗ, хальмг улсин тууҗла, сойлла, авг-бәрцлә таньлдулв. Зуульчнрт сенр хот, җомба, боорцг амсдг арһ учрв. Келхәс, хотна хаҗуд темәд зогсчаснь үзгдв, тегәд зәрм улс темә унад хотна эргндк һазрар йовсмн. Спортын халхар кесг марһанд бөкнр, харвачнр, җид хаячнр чидлән сөрв.
Байрин концерт төгссн хөөн цуг әмтн оошк нур, һалта булг болн алтн элсн тал темцв. Түрүн зогсалнь «айс һарһдг» элстә һазр болна. Энд-тенд үзгдсн моддыг элсиг зогсахин төлә суулһсн болдг. Зунар энд зара, моһа, гүрвлһ чигн һарсинь үзгднә. Дарук зогсал оошк өңгтә нур мөн. Эннь давста хагсҗах Колтан-нур \болна. Нуурин усн яһад оошк өңгтә болдгинь энд бичкн цаяхас олар бәәнә. Эн соньн маршрутыг төгсәҗәх зогсалнь – һалта булг. Энүг үзсн күн болһн йир өврнә. Усна тогтацд күкр болн водород ордг учрас булгин усн шатна. Эннь зуульчнрт – өврмҗ, бәәрн улст болхла
бахмҗ болад бәәнә. Эн соньн тоот хәләһәд, хәрү Адг селән тал йовсн хаалһин хойр таласнь гилвксн элсн үзгднә. Көлгән зогсаһад, олнәмтн һарч хәләв. Эн ормиг бәәрн улс Мигмр (Марс) һарагла дүңцүлнә. Өдрәр хәләхлә эн һазр улан өңгтә болна, деернь гилвксн шил мет юмн үзгднә, эннь слюда минерал бәәҗ.
Эн җил Бамб цецгин наадмд гиичнр олар ирҗәнә, таңһчин райодар йовҗ кесг соньн тоотла таньлдхмн. Ик зунь хальмг у-өргн теегт һарч бамб цецг цецгәрҗәхиг хәләнә.
Элст балһснд болхла амрлһна өдрмүдт бамб цецгин наадмин керг-үүлдврмүд бас болв. Н.Н.Пальмовин нертә Келн-улсин музейин өөр ишкә герт орҗ гиичнр хальмг улсин тууҗла, авг-бәрцлә тодрхаһар таньлддг арһта болв. Балһсна төвд бүрдәгдсн кесг талвңгудт бәәрн улс болн таңһчин гиичнр ирәд, тенд кесг мастер-класст орлцв. Көгҗмч Виктор Цойин бумблвин өөр баһчуд олар хурҗ, гитар цокч энүнә бичсн дуд дуулв. Көглтин Даван бумблвин өөр «Иньглтин шүлглән» нертә марһан цааранднь болад, Кайсын Кулиевин шүлгүд соңсгдв.
Элстин төвд тәвгдсн кесг палаткудт олн зүсн белгүд хулдгдв, тер мет хальмг улсин шимтә, сенр хот амсдг арһ бас олнд учрв. Долан хонгин күрән талвңд харвачнр чидлән сөрв. Үдин хөөн һурвн часла Диилврин талвңд Э. Манджиевин нертә «Герл» болн «Байн Тег» ансамбльмудын концерт болв. Дарук амрлһна өдрмүдт Бамб цецгин наадм таңһчин райодт болн Элстд цаарандан давхмн.

КАРСАНА Евгения

Видео