Чинвртә марһанд йилһрв

11-04-2023, 10:24 | Общество


«2023 җилин йилһән сән багш» гидг марһана дииләчнриг болн нүүрләчнриг Элстин муниципальн девсңгин йовудт йилһҗ авв

– Мана Элстин 23-ч тойгта сурһулин коллектив эклц классин багш Кермн Монолбаеваг эн марһана йовудт дөңнҗәләвидн, шишлң баг энүнд селвгән өгч, даалһвриг яһҗ сәәнәр күцәхин тускар дамшлтарн хувалцҗала. Талдан орлцачнр мет, Кермн Павловна бийиннь, көтлврин тускар келҗ өгәд, ил кичәл өгәд, даалһвран сәәнәр күцәһәд нүүрләчнрин тоод йовла. Зуг хойрдгч өдрин йовудт марһан чинврдәд, мана сурһулин элч нүүрлгч ормин төлә болсн дөрлдәнд өөдән орм эзлҗ чадсн уга. Байрин хургт Кермн Павловна «Багш» гидг әңгд үүдәгч кевәр орлцсндан дипломар ачлгдв. Хотл балһсна багшнрин марһанд орлцад мана сурһулин нер харсад, шунлттаһар үүлдснлә Кермн Павловнаг йөрәҗәнәвидн. Хоршасн дамшлтнь үүдәгч эв-арһ икдүлҗ, өдр-бүрин көдлмштнь дөң болтха гиҗ йөрәҗәнәвидн», – гиҗ энүнә үр багш Виктория Дженджиева келв.
Тиигҗ кесг сурһулин элчнр келх бәәсмн. Болв цугтан дииләчнр болҗ чадшгонь лавта. Ут-турштан марһанд 35 күн орлцв. Эдн тавн номинацд эв-дован үзүлҗ дөрлдв, тер тоод «Багш», «Педагог-сурһмҗлач», «ДОО-н сурһмҗлач», «Педагог-психологч» болн «Педагогин дебют» гидг әңгд эдн дамшлтан сөрв.
Хотл балһсна марһана дииләчнриг болн нүүрләчнриг, цуг орлцачнриг ачллһнд нерәдсн байрин хург Элстин бичкдүдин үүдәлтин бәәшңд мөрн сарин 7-д болв. Эн өдр тер мет Элстд педагогин болн багшин җил байрин бәәдлд секгдв.
– Эн җил хотл балһсна багшнр үүдәгч көдлмшән өргҗүлҗ, кесг керг-үүлдвр күцәхнь лавта. Эн аһу ик кемҗәтә үүлдврт бидн күцәмҗ дурдҗанавидн. Багшин болн сурһмҗлачин җил күцәмҗтә болтха! – гиҗ Элст балһсна һардврин толһачин дарук Дмитрий Довгополов зарлв. – Тер тоод дошкольн сурһмҗин, физкультурин болн спортын, төрскнч сурһмҗ өглһнә, сурһуль-эрдмин келн-улсин систем делгрүллһнә төсв күцәҗәх багшнрт болн сурһмҗлачнрт Элстин һардвр кесг мөрә йилһҗ өгх. 1 сай арслңг тер кергт йилһгдҗәнә. Тиим кевәр 2023 җилин аш диглсн кемлә бидн шин көтләчнрин болн нүүрләчнрин кесг нер медҗ авхвидн, – гиҗ балһсна һардврин элч темдглв.
Цааранднь цуг орлцачнриг Элст балһсна сурһуль-эрдмин залврин ахлач Арслан Эрендженов йөрәв: «Давсн җил Элстд 7 сурһульд бат ясвр күцәгдлә, эн җил бас 7 бәәшңгд шинрүллһн болхмн, дарук җил бас тиим то сурһулин гермүд шинәс хүврүлгдх. Тиим кевәр бидн мана багшнрин болн сурһульчнрин төлә көдлмшин сән таал тогтахвидн, шин өдгә цагин кергсл бәәшңгүдт углҗ тәвгдх, тиим таалд шин кесг эв-арһ өргәр олзлҗ, медрл өглһнә чинринь өөдлүлҗ болҗана», – гиҗ Арслан Владимирович келв.
Эн җил марһан улм соньнар, улм гүн учр-утхтаһар давв, тегәд чигн цуг орлцачнр сәәнәр белдҗ өөдән ашт күрв. Тер мет Элстин 3-ч болн 15-ч сурһульмудын һардвр эн туст белдврин сән көдлмш кев. Дәкәд болхла мана багшнрт болн сурһмҗлачнрт зүркни халтан өргҗәнәвидн, эдн баһ наста мергҗлтнрт, теднә күнд көдлмшт селвгәрн дөң болҗ дамшлтарн хувалцна. Цуг багшнрт теднә өрк-бүлмүдт бат эрүл-менд, улм ик күцәмҗтә үүлдвр дурдҗанав, – гиҗ Элстин сурһуль-эрдмин заллтын ахлач темдглв.
Тер мет байрин хургт ирсн таңһчин сурһуль-эрдмин министр Булган Ангирова багшнриг болн сурһмҗлачнриг, марһанд орлцачнриг йөрәҗ теднд үүдәгч үүлдврән өргҗүлҗ көдлтн, таңһчин марһанд ончртн гиҗ дурдв.
Дарунь марһана дииләчнр болн нүүрләчнр ачлгдв. Тер тоод жюрин шиидврәр «Багш» гидг номинацд дииләчин өөдән нериг Элстин классическ гимназин физикин багш Аркадий Болдунов зүүв. «Багшин болн сурһмҗлгчин җилин йовудт марһана дииләчин нер зүүлһн ик ачта болн ончта йовдл болҗана, – гиҗ санҗанав. Намаг дөңнҗәсн Элстин классическ гимназин коллективд ханлтан өргхәр седләв. Жюри цуг орлцачнрт онц оньган тусхаҗ, соньн сурвран өгч мадниг бас тасрхан угаһар урмдулҗала. Таңһчин марһанд хотл балһсна багшнриг бас нертәһәр элчлхүв гиҗ нәәлҗәнәв», – гиҗ дииләч келв.
Хойрдгч ормд Элстин олн салврта гимназин хальмг келнә болн утх-зокъялын багш Зоя Бисалиева һарв. Һурвдгч ормиг 17-ч тойгта сурһулин эклц классин багш Людмила Тавунова эзлв.
Бичкдүдин садмудын сурһмҗлачнр дунд түрүн ормиг 28-ч тойгта «Сар Герл» ДОО-н элч Марина Синяк эзлв, хойрдгч ормд 11-ч тойгта «Малышка» садын сурһмҗлач Байрта Адьяева һарв. Һурвдгч призернь 10-ч тойгта «Жаворонок» ДОО-н багш-логопед Ольга Малярова болв.
«Педагогин дебют» әңгд дииләчин күндтә нериг Элстин техникин лицейин физикин багш Ольга Бадмаева зүүв. Хойрдгч ормд олн салврта гимназин биологин багш Олег Настаев һарв. Һурвдгч ашт 2-ч тойгта дундын сурһулин хальмг келнә болн утх-зокъялын багш Валентина Семенова күрв.
«Педагог-психологч» дарани номинацд хамгин ик то балл хоршаһад дииләчин нериг Элстин олн салврта гимназин педагог-психологч Надежда Нидличиева зүүв. Хойрдгч ормд 18-ч тойгта дундын сурһулин педагог-психологч Елена Мутаева һарв. Һурвдгч призернь Элстин 10-ч тойгта сурһулин мергҗлт Баира Очирова болв.
Күндтә «Педагог-сурһмҗлгч» номинацд түрүн ормиг Элстин олн салврта гимназин орс келнә болн утх-зокъялын багш Наталья Шалхакова эзлв. Хойрдгч үзмҗд Элстин 4-ч тойгта сурһулин директор, орс келнә болн утх-зокъялын багш Елена орисовна Очир-Горяева күрв. Һурвдгч ормд 2-ч тойгта сурһулин орс келнә болн утх-зокъялын багш Татьяна Пугачева һарв.
Цуг дииләчнр болн нүүрләчнр 5 миңһнәс авн 50 миңһн арслң күртл мөрәһәр ачлгдв. Тиим кевәр хотл балһсна һардвр багшнрин көдлмшт улм ик оньган тусхаҗ, теднә үүдәлтин төлә улм сән таал тогтаҗана.

ТҮРВӘН Һуна

Зургт: Элст балһсна һардврин толһачин дарук Дмитрий Довгополов болн Элстин классическ гимназин физикин багш Аркадий Болдунов

Видео