Көтчнрә хурл олна күчәр тосхгдҗана

11-04-2023, 11:32 | Общество


Мөрн сарин 8-д, Целинн района Троицкое селәнә сойлын Герт Көтчнрә хурлын тосхлтыг дөңнҗәх буйнч седклин концерт болв. Үдин хөөн һурвн часин алднд мел концерт эклхин өмн генткн хур асхад орв. Хальмгудт эннь йир сән йор гиҗ цуһар темдглв. Керг-үүлдврин эклцәр Төв хурлын демч-лам Йонтен-гелң тәәз деер һарч, эн давулгдҗах буйнч седклин концерт сән йовдл, энүнә йовудт күн болһн әрүн кергт тәвцән орулҗ, эннь миңһн дәкҗ буйн болхинь лавта гиҗ келәд ном умшв.

Целинн района муниципальн бүрдәцин толһач Эрднь Опиев концертд ирсн улст ханлтан өргҗ, чинртә кергт орлцад, Көтчнрә хурлын тосхлһнд демән орулҗ чадҗанат гиҗ келв. Көтчнрә РМО-н толһач Санл Годжуровин келсәр, Целинн районд көтчнрәхн олар бәәнә, тегәд Троицкое селәнд концерт давулгдҗахинь темдгтә гиҗ келв. Урднь Көтчнрә района селәдәр кесг концерт болв. Буйнч седклин кергт орлцсн цуг артистнрт, энүг бүрдәсн улст Санл Вадимович ханлтан өргв.
Концертд дөрвн зун һар күн ирв, залд нам суудг чигн, зогсдг орм чигн үлдсн уга. Керг-үүлдврин туршарт хурлын тосхлтын йовудын тускар видео үзүлв. Хальмг Таңһчин ачта артистк Гилән Бембеева, таңһчин сойлын ачта көдләч Анатолий Мацаков, нертә дуучнр Мингиян Ханинов, Намҗл Болдырев, Цеден Конаев, Дмитрий Шараев, Феликс Шорваев, «Ингилән» бичкдүдин студьт орлцачнр, Сарпан дунд сурһулин багшнрин хор сәәхн еңсг дууһан дуулв. «Бамб цецг» бииһин болн дууна ансамблин артистнр концертин йоста кеермҗ болв. Эдниг дахад залд суусн улс ормасн босад биилв. Терүнәс нань мана орн-нутгин талдан регионмудт көдлҗ йовх көтчнрәхн эмч Валерий Бадмаев, Хальмг Таңһчин ачта багш Замба Кушов алсзәәһин эв-арһар халун мендән илгәв.
Көтчнрә хурл тосхлһна бүрдәцин комитетин ханьд ордг Михаил Кокаевин келсәр, көдлмш зураһар давҗана. Өдгә цагт хурлын тосхлтын дотрк көдлмшнь эклв. Удл уга герл орулгдхмн, дула өглһнә систем углҗ тәвгдхмн. Олна күчәр хурлан зуралсн цагтнь босххвидн, гиҗ Михаил иткүлв.
Келхәс, хурл тосхлһна төлә буйнч седклин дөң хуралһн 2020-ч җилд эклв. Тер цагас авн орн-нутгин регионмудт бәәдг нег һазра мана улс даңгин демән өгүлҗ тәвцән орулҗ йовна, гиҗ онц темдглх кергтә. Троицкое селәнд тәвн җилдән бәәдг йирн негн наста медәт Дорҗ Бадмаевин келсәр, эн Көтчнрә района Алцңһуд селәнә Цегрг хотнд һарсн күн болна. 1973-ч җилд Троицкое селәнүр өркбүләрн нүүҗ ирв. Энд үрдән өскҗ босхад, сурһульд орулад, авальтаһан хамдан эднән кү кесмн. Көтчнрт хурл тосхгдҗахин тускар соңсад, эн туст буйнч седклин концерт болхиг медәд, нааран ирсм тер. Үрдтән, ачнр-зеенртән цугтаднь җиңнүлҗ эн әрүн кергт эрк биш орлцх кергтә, гиҗ дуудвр кесн биләв, гиҗ Дорҗ Мучкаевич келв.
Иим кевәр буйнч седклин концерт Троицкое селәнд давсмн. Энүнә йовудт 521 миңһн шаху арслң хурагдсн болдг. Зураһар хурлын тосхлт эн җилин чилгчәр төгсх зөвтә.

КАРСАНА Евгения

Видео