Дамшлтта депутатнр эрлһән орулв

13-04-2023, 09:51 | Общество


Эн намрар болх Хальмг Таңһчин Улсин Хуралын (Парламентин) депутатнриг суңһвр угтҗ «Негдсн Әрәсә» партин седвәрәр урдаснь дууһан өглһнә керг эклсн бәәнә. Эн керг-үүлдвр хөн сарин 22-ас авн 28 күртл болхмн. Шидр дәкәд һурвн күн терүнд орлцхин тускар зәңглв. Урдаснь дууһан өглһнә кемд орлцх саната улс мөрн сарин 27 күртл бәрмт цаасан орулх зөвтә.

Хальмгин Баатр, Хальмг Таңһчин Улсин Хуралын (Парламентин) депутат, Хар Һазра района «Первомайский» ПЗ-н СПК-н һардач Болдра Валерий урдаснь дууһан өглһнә кергт орлцхин төлә эрлһән орулв. Келхд, Валерий Астаевич зака үүдәгч үүлдврин туст байн дамшлт хоршасмн, эн таңһчин Парламентин дөрвн хуралтын депутат болна.
Таңһчин Улсин Хуралын (Парламентин) дәкәд нег депутат бәрмт цаасан орулв. Эннь А.Цебековин нертә шаңһа хорин художественн һардач, «Теңгрин әдстә» нертә эрмдгтә бичкдүдиг асрҗадг өрк-бүлмүдт дөң күргдг олна ниицәнә ахлач Ольга Сердюкова болна. Сүл күсдундур җилин эргцд депутат гемтә-шалтгта бичкдүдт дөң күрглһнә, эднә төлә сурһуль-эрдмин бүрдәцст сән таал тогталһна болн нань чигн төрмүд хаһлв.
Элст балһсна Хургин депутат Цекрә Зулта муниципальн зака үүдәгч органд үүлдҗ, әмтнә төрмүд хаһллһна туст бас күцәмҗтәһәр үүлдҗәнә. Хотл балһсна әмтн босхсн төрмүдиг оньгасн алдхш, энүнә орлцлһтаһар шин хаалһс, бичкдүд нааддг болн спортивн талвңгуд тосхгдв, залврин компаньсла сән нөкцлт батрв. Нег һазра улстан туста болҗ цааранднь үүлдхин төлә эн таңһчин Улсин Хуралын (Парламентин) суңһврт орлцх санаһан медүлв.

БАТАН Сәәхлә

Видео