Нертә пианист Вадим Пальмовин концертд иртн!

13-04-2023, 09:54 | Общество


Мөрн сарин 27-д Б.Б.Городовиковин нертә Хальмг ик сурһулин хальмг келн-бичгин болн дорд үзгин шинҗллһнә күрәлңгин ул деер нертә пианист Вадим Пальмовин «Music is light» нертә концерт-күүндвр болхмн. Керг-үүлдвр «Зурач» төсвин йовудт бүрдәгдҗәнә. Шидр энүнә тускар «Калмыкия» РИА-н барин төвд брифинг болв.

Концерт-күүндвр хальмг тууҗин шинҗләч, номт Н.Н.Пальмовин 150 җилин өөнлә ирлцүлҗ болхмн. Вадим Пальмов болхла номтын элгн-саднь болна, эн Санкт-Петербург балһсна фортепьянон сурһулин элч, оркестрла хамдан даңгин олн концерт давулна, терүнәс нань кесг дегтрин түүрвәчнь болна. Концертин көтлврт Бахин, Моцартын, Шопена, Эвансин, Мендельсона болн талдан нертә көгҗмчнрин үүдәврмүднь орна.
Продюсер Виктория Инджикован келсәр, иим керг-үүлдвр мана таңһчд давулна гидгнь ончта болн дааврта керг болна. Көгҗмәр соньмсдг, тер мет эгл улст иим нертә пианистиг үзҗ үүдәврмүдинь соңсх саам учрхмн гив.
Концерт «Music is light» гидг нертә, эннь учрта, юңгад гихлә В.Пальмов мел иим нертә дегтр бичҗ барас һарһсн билә, гиҗ седкүлч Ирина Долгина темдглв.
Тер мет мөрн сарин 29-д Элстин билг-эрдмин сурһульд эрлһән эртәснь орулсн көвүд-күүкдин төлә Вадим Пальмов мастер-класс давулхмн.

ОЛЬДАН Цаһан

Видео