Нґкцлт делгрлт авчана

15-04-2023, 10:11 | Общество


Эн өдрмудт Хальмг Таңһчд Марий Эл Республикин сурһуль-эрдмин салврин көдләчнрин делегац гиичлҗәнә. Эдн Баһ Дөрвда болн Элстин сурһульмудар болн гимназьмүдәр йовад, хальмг багшнрин кичәлмүдт орлцҗ, сурһмҗин, медрл өглһнә көдлмш ямр кевәр күцәгдҗәхинь хәләв.

Эн керг-үүлдвриг ашлҗах селвлцән таңһчин залврин сүүрин залд мөрн сарин 12-т болв. Энд Марий Эл Республикин делегац болн таңһчин райодын болн Элстин сурһульмудын бүрдәцсин һардачнр, сурһуль-эрдмин болн номин министерствин көдләчнр цуглрв. Селвлцәг нүр үгәр таңһчин залврин Ахлач Босхмҗин Гилән секв. Цаг ирвәс багшин эрдмин чинрнь өсәд йовна, яһад гихлә эдн хамгин күнд болв чигн, олнд цань уга ик туста болн ик чинртә көдлмш күцәҗәнә, эдн бичкдүдин болн арвтнрин билг-дасмгинь илдкҗ, теднд төрскнч болн шагшавдын сурһмҗ өгнә, иргч күцәмҗин бат ул тогтана. Тиим олн халхин үүлдвринь таңһчин һардвр өөдәнәр үнлҗәнә, теднә күч-көлснә таалынь ясрулна. Баһ Дөрвдә болн Целинн райодт шин сурһульмудын гермүд тосхгдв. 2023-ч җил 24 сурһульд бат ясвр кегдх, 2022-ч җилд 17 бәәшң шинрүллһнә хөөн эдлврт орла, 4 немр гер тосхгдла, тиим кевәр сурһульчнрин төлә немр 805 орм тогтагдла, гиҗ залврин Ахлач темдглв.
2022-ч җиләс авн багшнрин җалвин кемҗән өөдлҗәнә, ода эннь дундын җалвас ик болҗана. Сурһульмудын коллективс шинрлтин туст кесг төсвиг бәәдл-җирһлд тохраҗана, медрл өглһнә халхар сән күцәмҗ бәрҗәнә. Элстин лицейин төгсәһәчнр орн-нутгин хамгин сән вузмудт сурчана. Эн үзмҗәр лицей ЮФО-д 1-ч орм эзлҗәнә, тернь цуг таңһчин төлә ик байрта-бахта йовдл гиҗ Гиляна Герасимовна заав.
Нґкцлт делгрлт авчана


















Дарунь Марий Эл Республикин сурһуль-эрдмин Күрәлңгин проректор Оксана Кропотова мана таңһчд бәәлһнә тускар тоолврарн хувалцв: «Хальмг Таңһчин сурһульмудын көдлмшлә һурвн өдрин эргцд таньлдлавидн, тернь маднд байр-бахмҗ үүдәҗ гүн учр-утхта йовдлд хүврв. Бидн тана багшнрин ил кичәлмүдт кесг тоот, шин дамшлт хоршаҗ аввидн, эдн йоста эрдмчнр болҗ бийән үзүлв, күүкдт гүн медрл өгдг кесг нәрн эв-арһан үзүлв.
Тер мет Хальмг КРИПКРО күрәлңлә нкцлтән җил ирвәс өргҗүлҗ йовнавидн. Мана марийск филологин болн хальмг Күрәлңгин торскн кел даслһна тиңкмс хамцу кевәр көдлҗәнә. Тер нөкцлтән цааранднь батрулхар зуралҗанавидн. Хальмг күрәлңд сән коллектив көдлҗәнә, сурһулин өдгә цагин кесг төрәр эдн тодрха керг-үүлдвр күцәҗәнә.
Сурһульмудт келн-улсин сойлд, тууҗд, авъяст нерәдсн баһ биш көдлмш куцәгдҗәнә, тернь маднд бас таасгдв. Тиим кевәр сурһмҗин болн медрл өглһнә кесг салврар бидн дамшлтарн хувалцҗ чадҗанавидн, хальмг багшнр мана тал гиичд ирх гиҗ күләҗәнәвидн», – гиҗ Оксана Евгеньевна темдглв.
Тер мет 2012-ч җиләс авн Республикин Хальмг Таңһчин болн Марий Эл багшнрин профсоюзмуд өргнәр нөкцлтҗ «Таир» наадмд харһна, энд баһ наста багшнр болн сурһмҗлгчнр дамшлтарн хувалцҗ кесг марһанд орлцҗ медрлән болн олна көдлмшин эв-арһан гүүдүлнә. Бидн хальмг багшнриг эн җил бас күләҗәнәвидн гиҗ Оксана Евгеньевна онц заав.
– Марий Эл Республикин сурһуль-эрдмин профсоюзла бидн кесг җилин эргцд нөкцлтҗәнәвидн, төрскн келнә, авъясин, баһ наста багшнриг сурһмҗллһна төрмүд маднд өөрхн. Мана гиичнр Адг селәнд, оошг өңгтә нуурт маднла хамдан одад ирв, хальмг һазрин йиртмҗ цуг гиичнрт таасгдна, мана таңһчин олн-әмтн чигн тер тоотла өөрхнәр таньлдх зөвтә, – гиҗ сурһуль-эрдмин көдләчнрин профсоюзин ахлач Антонина Коокуева селвлцәнә йовудт тоолвран келв.
Тер мет сурһуль-эрдмин болн номин министрин дарук Мацга Өлзәт болн сурһульмудын һардачнр, Марий Эл Республикин делегацин элчнр дамшлтарн хувалцҗ нөкцлтән цааранднь делгрүлхмн гиҗ үгцв.
Эн тодрха күүндврин ашинь Хальмг Таңһчин залврин Ахлач Босхмҗин Гилән диглҗ, мана нөкцлт цааранднь чигн делгрҗ йовтха, хойр республикин һардвр терүг дөңнҗәнә гиҗ темдглв. Нег үлү Хальмг Таңһчд кесг җилин туршарт залвриг һардҗасн, ода Марий Эл Республикин Толһач болҗадг Юрий Зайцев мана иньгллтиг батруллһнд ик нилчән күргҗәнә, мана залвриг һардҗасн цагла Юрий Викторович экономикин кесг халхар ик дамшлт хоршала, ода Марий Эл Республикиг һардлһнд тернь ик дөң болҗахнь лавта, мана иньгллт Әрәсән цуг субъектиг хамцуллһнд бас нилчән күргәд йовтха гиҗ Гиляна Герасимовна товчлв.

ТҮРВӘН Һуна

Видео