Келмрчин санлд нерәдҗ

15-04-2023, 11:30 | Общество


Әрәсән күүкд улсин ниицәнә Хальмг региональн әңгин болн Амр Санана нертә Келн-улсин дегтрин саңгин седвәрәр бичкдүд дунд зургудын марһан зарлгдв. Нертә келмрч Наниш Чонаевич Обушиевд эн марһан нерәдгдҗәнә.

Эн ниицәнә Хальмг региональн әңгин ахлач Кинзән Киштән келсәр, бичкдүд «Буҗң Дава хан» гидг хальмг баатрльг тууляр зург зурх зөвтә. Эн туулиг келмрч Овшин Нанишәс бичҗ авсмн. Марһанд таңһчин дунд болн билг-эрдмин сурһульмудт сурчах 12-17 наста күүкдкөвүд орлцҗ чадҗана. Олна ниицәнә социальн халхд эн марһанд орлцачнрт туулин тасрха өггдҗәнә. Тер мет тенд марһана неквр бас барлгдсн бәәнә. Марһанд орлцачнр мөрн сарин 10-ас авн хөн сарин 25 күртл зургудан илгәх зөвтә. Марһанд диилвр бәрсн бичкдүдиг Амр Санана нертә Келн-улсин дегтрин саңд мөчн сарин 1-д ачлхмн. Эн өдр бичкдүдиг харслһна нарт-делкән Өдр болна, тегәд күүкд-көвүдиг сән Өдрлә йөрәҗ, белг бәрүлҗ өгхмн.
Наниш Чонаевич 1905-ч җилд һарсмн. Эн хальмг улсин амн үгин зөөр сәәнәр меддг нертә келмрч болсн деерән ут ду дуулдг бәәсмн. «Буҗң Дава хан» гидг хуучн туулиг энүнәс 1960-ч җилмүдт хальмг номт Окна Борис бичҗ авсмн. Әрәсән номин академин Хальмг номин төв эн туулиг хальмг улсин амн үгин зөөрин хураңһуд барлсмн.

ДООҖАН Наталья

Видео