«Тюльпанчикин» концертд одв

18-04-2023, 09:10 | Общество


Шидр Хальмг Таңһчин Толһач Хаска Бату Е.Толкачевин нертə «Тюльпанчик» бичкдүдин шаңһа ансамблин һучн җилин өөнд нерəдсн байрин концертд орлцв.

Бичкдүдин эн ансамбль мана таңһчд бəəтхə, талдан регионмудт болн орн-нутгудт нерəн туурулсн болдг.
Бичкндəн би бас биилдг билəв. Тегəд «Тюльпанчик» ансамблин өөнин концертд үрдтəһəн ирлəв. Мел бииһəр дамҗад, эврəннь сойлан үнлдг арһта болнавидн. Дамшлтта багш Людмила Толкачеван һардврт көвүд-күүкд йоста биичнр, артистнр болҗ өсв, гиҗ Бату Сергеевич темдглв.
«Тюльпанчик» ансамбльд Евгений Толкачев ик тəвцəн орулсн болдг. Энүнə ач-тусинь хəрүлҗ керг-үүлдврин йовудт санлынь тевчв. 1989-ч җилд Толкачевихн мана таңһчд ирҗ, бичкдүдин ансамбль бүрдəҗ, олн бичкдүдиг негдүлв. Тер цагас авн ансамбльд орлцачнр ик, ниитə өрк-бүл болад үүлдҗ йовна.
Ямр чигн орн-нутгин, региона, келн-улсин тууҗ сойлас эклдг мөн. Мана хальмг байн сойлыг дөңнхин төлə материальн-техническ улынь ясрулҗ, мергҗлтнрин тооһинь бас икдүлх кергтə болна. Хальмг сойлын делгрлтд тəвцəн орулҗах коллективиг Хаска Бату темдглҗ, ончта өөнлəнь йөрəв.
Онц келхəс, байрин концертын йовудт Бату Сергеевич Людмила Толкачевад «Хальмг Таңһчин күндтə иргн» гидг өөдəн цол зүүлһгдснə тускар олнд соңсхҗ медүлв.

ОЛЬДАН Цаһан

Видео