Буйнч керг əмтиг хамцулв

18-04-2023, 09:30 | Общество


Шишлң цергə керг-үүлдвр эклснəс авн мана таңһчд «Бидн хамдан» гидг региональн штаб үүлдҗ, цергчнрт болн теднə өрк-бүлмүдт дөң күргҗəнə. Таңһчин əмтн ик-баһ уга буйнч седклин кергт орлцҗ, цергчнрт килмҗəн тусхаҗана. Ах үйин улс эврəннь пенсин мөңгнəс цергчнрт демəн күргнə, ээҗнр дулан өөмс өлгнə,таңһчин бүрдəцсин көдлəчнр хот-хол, шишлң кегдлмүд хулдҗ авна, бичкдүд болхла цергə даалһвр күцəҗ йовх нег һазра улсиг дөңнҗ бичгүд бичнə. Тиигəд күн болһн эврə тəвцəн орулхар зүткнə.

Элстин техническ лицейин сурһульчнр одахн буйнч седклин яарм бүрдəҗ, хоршаҗ авсн мөңгəрн цергчнрт эм хулдҗ авв. Лицейд үүлддг «Волонтеры-медики» олна җисəнд орцлачнр «Бидн хамдан» гидг төрскнч седклтə керг-үүлдвр бүрдəҗ, хамдан сурчадг күүкд-көвүдт үлгүр болв. Ик Буурла района Орһахн селəнə Э.Чоноскаевин нертə дунд сурһулин сəн дурар үүлддг күүкд-көвүдин отряд бас буйнч седклин яарм давулад, цуглулсн мөңгəр гөлм өлгх эд-тавр хулдҗ авв. Целинн района Троицкое селəнə дунд сурһулин сурһульчнр багш Мантан Саглрин һардврт шишлң цергə керг-үүлдврт орлцачнрин төлə бас гөлм гүрҗəнə. Цергчнр эн гөлмиг кеер бу-селмиг бүркҗ хортнас бултулхмн. Күүкд багштаһан хамдан өлгсн гөлмиг районд сəн дурар үүлддг «Сəн керг күцəх цаг» гидг штабд күргҗ өгхмн. Келхд, района əмтн буйнч седклин кергт шунмһаһар орлцҗ, нег һазра цергчнриг сəəнəр дөңнҗəнə.
Мана таңһчас шишлң цергə керг-үүлдврт район болһна элчнр орлцҗахнь маһд уга. Тегəд райодын селəдт цергчнрт илгəвр белдҗ, эднд цуг халхин дөң күргнə. Шидр Октябрьск района Северный поселкд бəəдг Хамзинə, Хулхачин, Муевин, Саңһҗин, Мархадыка, Дарман, Армана өрк-бүлмүд «Бидн хамдан» гидг региональн штабд цуглулҗ авсн илгəвр авч ирв. Əрəсəн Баатр Лиҗин Мингияна эк Баир Владимировна цергə даалһвр күцəҗ йовх нег һазра улсин төлə шав авсн цагт түрүн дөң күргхд олзлгддг кегдл хулдҗ авхин төлə мөңг йилһҗ өгв. Региональн штаб энүнə мөңгəр хулдҗ авсн кегдлмүдиг цергчнрт күргҗ өгв.
Эгл улс буйнч седклин кергт дөңгəн күргҗəхəс нань олна бүрдəцс болн ниицəс бас цергчнрт кергтə эм, хувц-хунр, хот-хол болн олн зүсн кегдлмүд цуглулҗ йовулна. Одахн Улан Кирсин болн «Негдсн Əрəсə» партин региональн əңгүдин элчнр Донбассин улсин төлə дегтрмүд цуглулв. Урднь эдн бас дегтрмүд региональн штабд авч ирсн билə. «Эн дегтрмүд бичкдүд болн бөдүн улст керглгдхнь лавта. Күн болһнд тууҗиг эврəннь төрскн келəр дасх зөв бəəнə», гиҗ Элст балһсна Хургин депутат Максим Сорокин келв.
Цергə даалһвр күцəҗ йовх улсин өрк-бүлиг бидн оньг угаһар үлдəшговидн, гиҗ таңһчин Толһач Хаска Бату дəкн-дəкн темдглнə. Көвүднь, авальнь болн эцкнь цергə керг-үүлдврт орлцҗах цагла өөрхн улст нег үлү мана килмҗ кергтə болна. Тиигəд, «Бидн хамдан» гидг региональн штабд цергчнрин өрк-бүлмүдəс орҗ ирсн эрлһəр дарунь дөң күргнə, эдниг сəн өдрмүдлə йөрəнə, бичкдүдин төлə олн зүсн керг-үүлдврмүд давулна. Ода сад-һарудт хаврин көдлмш күцəх кергтə болна, тегəд сəн дурар үүлддг баһчуд цергчнрин элгн-саднд дөң болна. Шидр нег цергчин экнь герин һаза хог-бог хураҗ сəн таал тогтахд дөң болхиг сурв, баһчуд дарунь тиигəрəн һарч йовв. Цергчин экнь шулун-шудрмг баахн улс цугинь кеһəд, герин һаза хог-бог ахулснд ханлтан өргв.
«Би гисн негн, бидн гисн олн» гиҗ хальмг үлгүрт келгддгəр, цуһар күчəн негдүлҗ, ниитə болхла ямаран чигн керг күцəгднə. Нег-негəн дөңнҗ, иим күнд цагла хамдан бəəх кергтə гиҗ таңһчин əмтн тоолҗана.

ДООҖАН Наталья
ЗУРГТ: сəн дурар үүлддг баһчуд цергчин экд дөң болҗах кем

Видео