Зоопаркд хойр темə белглв

20-04-2023, 09:10 | Общество


Шидр Хальмг Таңһчин Толһач Хаска Батун даалһврар таңһчин Залврин дарук Дмитрий Трапезников, селəнə эдл-ахун министрин үүлиг цаг зуур дааҗадг Тимур Гаваев болн министрин селвгч Александр Захаров Донецк Улсин Республикин Мариуполь балһснд одҗ, теднə зоопаркд хойр темə белглв.

2022-ч җилд цергə шишлң керг-үүлдвр эклснəс авн Мариуполь балһсна зоопарк эвдрəд, аңгудын ик зунь үкв. Мариуполин бəəрн улст болн бичкдүдт хальмг теегин темəд эрк биш өврмҗтə болх. Таңһчин селəнə эдл-ахун министрин үүлиг цаг зуур дааҗадг Тимур Гаваевин темдглсəр, мана темəд ямр чигн таалд амрар бəəҗ, чиңнүрнь 400 шаху киил тогтана. Мана таңһчд темəд немр хотар теткгднə, Мариуполин зоопаркд болхла люцерн өвсəр болн хольгдсн хотар асргдхмн.
Терүнəс нань хойр регион хоорндан нөкцлтхəр үгцв. Мариупольд Хальмг Таңһчд кеҗ һарһдг эд-тавр хулдҗ болхмн.
Эн балһсна толһач Олег Моргуна темдглсəр, өдр ирвəс хəрҗ ирҗəдг бəəрн улсин то өсəд йовна. Балһсна лавксиг хальмг махар теткхлə, сəн болх билə. Эн төрəр бас күүндвр болв.

ОЛЬДАН Цаһан

Видео