Нег һазра улсин җирһлинь ясрулхар

20-04-2023, 09:30 | Общество


Җил болһн мөрн сарин 21-д мана орннутгт бəəрн залврин Өдр темдглнə. Энтн селəнə, балһсна эс гиҗ района муниципальн бүрдəцин бəəрн залврин органмудын көдлəчнрин сəн өдр болҗана. Бəəрн залврин органмудын элчнр хамгин түрүнд əмтнə некврмүд күцəхəр шунна.

Яшкулин района Тавн Һашун селəнə муниципальн бүрдəцин толһач Ондика Надежда арвн нəəмн җилдəн эн дааврта үүл күцəҗəнə. Лаганя районд өсəд-боссн күүкд күн Хальмг ик сурһуль төгсəснə хөөн 1976-ч җилд нааран ирəд, бəəрн сурһульд күч-көлснə хаалһан эклсмн. Энд һучн шаху җилдəн багшлад, һардач болҗ көдлснə хөөн Надежда Наминовна СМО-н толһачин үүлд орв. Түрүн болҗ 2005-ч җилд селəнə депутатнр эн үүл даалһсна хөөн эн дөрвн дəкҗ толһачд суңһгдв. Эн җилмүдин эргцд кеҗ-күцəсн көдлмш баһ биш, кесг чинртə төрмүд хаһлгдв.
– Мана селəнд урднь газ болн залһлдан уга билə. Тегəд хамгин түрүнд əмтнə гермүдиг дулаһар тетклһнə төр хаһлхар зүтклəв. Ода мана гермүд газар түлгднə, үвлднь йир дулан болна. Арвн һар җил хооран сəн залһлдаһар тетклһнə төр бас хаһлҗ чадвидн. Бидн района төв селəнəс тəвн дуунад бəəнəвидн, хату девскртə хаалһ уга болҗахнь маднд зовлңта болҗана. Хур-цасн орхла йовдг арһ тасрна. Дəкəд усар тетклһнə төр мадниг бас үүмүлҗəнə. Хəрнь, хойр җил хооран шаңһа көтлврт орлцад, худг малтад терүнə усар малан услнавидн, – гиҗ Надежда Наминовна келв.
Селəнə муниципальн бүрдəц бəəрн улсин дөң-тусар кесг төр хаһлҗ хамцу үүлднə. Тиигəд, эдн селəнə бүрдəцин седвəр дөңнлһнə көтлврин медлд таңһчин бюджетəс немр мөңг авад үкəрин эргндк һазриг чигн ахулҗ сəн таал тогтав. Бəəрн улсин олна дөңгəр бичкдүд нааддг тавлң углҗ тəвгдв. Эн төрмүд хаһллһнд селəнə улсин цуглулсн мөңгнд бəəрн болн таңһчин бюджетмүдин мөңгн немгдв. Давсн җилд селəнд «Эрүлменд харлһн» гидг келн-улсин төсвин медлд шин ФАП тосхгдв, тенд фельдшер болн акушер көдлнə, тегəд селəнə улст түрүн дөң күрггднə. Селəнд эврə сойлын Гер уга болҗахнь бас нег чинртə төр болҗана. Ода байрин керг-үүлдврмүд, харһлтс СМО-н бəəрнд давулгдна. Надежда Наминовнан келсəр, урднь бəəсн ФАП-ин бəəрнд ясвр кеһəд, тенд сойлын Гер секхин төлə бəрмт цаас белдҗəнə. Сойлын Герин һардач Лиҗин Бобба байрин керг-үүлдврмүд бүрдəҗ, нег һазра улсин җирһл кеерүлхəр шунна. Селəнə дунд сурһульд ода зуг нег сурһульч сурчана, тернь удл уга сурһулян төгсəхмн.

Ямр нег төр учрхла Тавн Һашун селəнə эдл- ахун артелин һардач Аппан Леонид болн фермермүд дөңгəн күргнə. Селəнə толһачин түрүн нөкд болдгнь СМО-н мергҗлт Манҗин Зула болна. Эдн хамдан долан җилдəн көдлҗəнə, Зула Борисовна олн зүсн бəрмт цаас, бичг, эрлһ белднə, орҗ ирсн цаасиг диглнə. Эн көдлмштəн ик дааврта, цугинь арднь орҗ күцəнə, тегəд эднə үүлдвр күцəмҗтə болна.
Хөр шаху җилдəн нег селəнд толһачин үүл дааҗ йовх Ондика Надежда чадмг һардач болад, ик дамшлт хоршав. Надежда Наминовна «Хальмг Таңһчин улсин эдл-ахун ачта көдлəч» гидг өөдəн цол зүүҗəнə, Əрəсəн олн-əмтнə сурһуль-эрдмин йилһəн сəн көдлəч болна, энүнə ач-тусиг темдглəд, таңһчин Толһачин ханлтын бичгəр болн таңһчин Залврин Күндллһнə һашгар ачлгдсмн.

ДООҖАН Наталья
Зургт: Тавн Һашуна СМО-н толһач Ондика Надежда болн поштын һардач Мүкөвүнə Евгения


Видео