Əмтнə əм аврҗ дөңгəн күргнə

20-04-2023, 10:00 | Общество


Эндр мана орн-нутгт цусна донормудын келн-улсин Өдр темдглгдҗəнə. Эн сəн өдр хамгин түрүнд эврə сəн дурар цусан өгч, гемтə болн зеткртə йовдлла харһҗ шарх-шав авсн əмтнə əм аврлһнд дөңгəн күргдг улст нерəдгдҗəнə. Тер мет эн өдриг цус авдг, терүг шинҗлдг, цус авлһна шин эв-арһ болн кергсл ухалҗ һарһдг, цус гүүлгдг станцсин санитарн бəəдл бүрткдг улс темдглнə. 1832-ч җилд Санкт-Петербург балһснд баахн эмч Андрей Вольф цаһан төр болсн күүкд күүнд авалиннь цус гүүлгəд əминь аврсмн. Тер йовдлд нерəдəд эн өдр зарлгдсн болдг.

Əрəсəд җил болһн күсдундур сай күүнд цус гүүлгх кергтə болна. Күнд гемтə, əəмшгтə эрдмтə улст, цаһан төр болсн күүкд улст, бачм болн олн зүсн зеткртə йовдлла харһсн əмтнд эднə əм аврхин төлə талдан күүнə цусн керглгднə. Тер цагт донормуд дөңгəн күргнə. Эдн кенд цусан өгсəн медхш, болв эднə дөңгəр əмтн əмд-менд үлдснь эднə төлə ик чинртə болна. Эднə ач-тус хəрүлхин төлə мана орн-нутгт «Əрəсəн ачта донор» гидг нерн зүүлһгднə, җилд нег дəкҗ демин мөңг өгнə, нань чигн социальн харслтын керг-үүлдврмүд күцəгднə. Дөчн дəкҗ эврə сəн дурар цусан өгсн улс ачта донорин нер зүүнə. Мана таңһчд тиим миңһн һар күн бəəнə. Тедн дунд Мучкан Анатолий, Баклана Батр, Нəəмнə Булһн, Бембин Евгений, Бадмин Алексей болн нань чигн улсиг зааҗ болхмн. Дөчн җил хооран Мучкан Анатолий шав авсна хөөн донорин цус энүнд гүүлгснə хөөн əмд үлдв, тегəд тер йовдлын хөөн эн бас сəн дурар цусан өгдг болв. Нəəмнə Булһна эцкнь донор бəəсмн, терүнə үлгүрəр хойр күүкнь бас əмтнд дөң күргдг болв. Баклана Баатр оютн бəəсн цагт нег бичкн күүкиг шалз зуусна хөөн тер күнд кевəр гемтв, тегəд əмтнə цусн керглгдҗəхиг соңсад эн донор болв. Түрүн дəкҗ эн əрүн чинртə кергт орлцсна хөөн җил болһн цусан өгдг болв. Хөр һар җилин эргцд залу күн йирн шаху дəкҗ цусан өгв. Көвүһəн дахад экнь бас донор болв, көвүнь насни дигт күрхлəрн бас эврə дурар цусан өгхəр шиидв. Тиигəд эдн цусан өгч əмтнə əм аврдг деерəн элгн-садндан үлгүр-үзмҗ болв.
Цус гүүлгдг төвин мобильн станц донормудын то икдүлхин төлə райодар йовҗ бəəрн əмтнə цус авлһна керг-үүлдвр күцəнə. Одахн эдн Лаганя, Хар Һазра болн Яшкулин райодт одв. Дөрвн өдрин эргцд ут тоодан һурвн зун күн эврə дурар цусан өгв. Эдн дунд зəрмнь урднь цусан өгəд уга улс билə, кесгнь эн кергт җил болһн орлцна, тегəд түрүн зерглəнд ирв. Үлгүрнь, Комсомольск селəнд бəəдг Торлыка Татьяна хамдан көдлҗəдг үүрмүдтəһəн эн кергт җил болһн орлцна. Эдн «Байр» гидг бичкдүдин садт көдлнə, районд цус авлһна керг-үүлдвр давулгдхиг соңсад, хамдан терүнд орлцхар шиидв. «Мини үүрмүд Хазыка Татьяна болн Минҗин Надежда эн кергт бас орлцна, энтн мана сəн авъяст хүврв. Элст балһснд эврə кергəрн ирхлəрн би цус гүүлгдг төвд одҗ цусан өгхəр шуннав. Иим керг-үүлдвр эрк биш давулх кергтə. Цусан өгдг улс чик авг-бəрцəр бəəнə, эднə эрүл-менд бат болна, цус өгснə хөөн махмуд шинрүлгдсн болн чидл урһсн болҗ медгднə. Кенд мини цусн керглгдхиг би медхшв, болв күнд бəəдлд туссн күүнə əм аврхв гиҗ саннав. Мини цусн кенд чигн зокна. Цусан өглһн ик дааврта керг, тегəд баһчуд терүнд орлцхиг дуудвр кеҗəнəв», – гиҗ Торлыка Татьяна келв.
Эндр донормудын келн-улсин Өдрт нерəдҗ Элстд төв талвңд цус гүүлгдг мобильн станц көдлхмн. Өрүн 8 часас авн үд күртл əмтн эврə сəн дурар цусан өгч чадҗана. Авъяст тохрсар, эн өдр олн җилдəн цусан өгчəх улсин ач-тусинь темдглҗ, эдниг сəн өдрлə йөрəхмн.

ДООҖАН Наталья
ЗУРГТ: Торлыка Татьяна цусан өгчəх кем

Видео