Бат ясврин йовудыг бүрткв

18-11-2023, 09:05 | Общество

Шидр Хальмг Таңһчин Залврин Ахлач Босхмҗин Гилән Б.Б.Городовиковин амрлһна герт болҗадг бат ясврин йовудыг бүрткҗ, тенд селвлцә давулв.

2022 җилин чилгчәр таңһчин Толһач Хаска Батун седвәрәр Әрәсән баһчудын кергүдәр үүлддг Агентствлә «Регион для молодых» көтлвриг күцәхин төлә бооца батлгдв. Советин Союзин Баатр Б.Б. Городовиковин резиденцд бат ясвр күцәлһн эн көтлврт орв.
Удл уга бар сард ирлцңгү ясвр төгсх зөвтә. Энүнд таңһчин баһчудын төлә олн салврта Төв көдлхмн. Н.Н. Пальмовин нертә Келн-улсин музейин, архивин, олна бүрдәцсин элчнр тенд нертә үүлдәчин хора-музей бүрдәхмн. Тер мет фотовидеостудь, ШКИ болн талдан тоот бас секгдхмн. Чинртә объектин ясврт 130 сай шаху арслң һарһгдв.
– Мел эн ормд баһчудын Төв бүрдәгдхнь темдгтә, төрскнч седклтә көвүд-күүкдиг нертә үүлдәчин үлгүрәр сурһх кергтә, – гиҗ Гилән Герасимовна келв. Тууҗлгч чинртә объектин бат ясвриг күцәҗәдг улст премьер-министр ханлтан өргв.
Терүнәс нань Элстд сойл делгрүллһнә Төвин тосхлтыг Босхмҗин Гилән бас бүрткҗ хәләв. «Сойл» келн-улсин төсвин йовудт тосхгдҗадг объектд 176 сай шаху арслң йилһгдсн билә.
Зураһар хойр давхр герт сойлын коллективс бәәршлхмн, бичкдүдин бииһин кесг секц көдлхмн. Тер мет таңһчин болн балһсна бәәрн улсин төлә керг-үүлдврмүд шин төвд бас бүрдәгдхмн. 2024 җилд эн Төв секгдхмн гиҗ зуралгдҗана.

КАРСАНА Евгения

Видео