Өөдән үүлд батлгдв

Сегодня, 12:05 | Общество, Таңһчин зәңгс, Зіњг

Шидр Әрәсән Федерацин сенатор Хачира Борис селәнә эдл-ахун, эдл-уушин политикин болн йиртмҗин көрң олзллһна әңгин ахлачин дарукин үүлд батлгдв. Хальмг Таңһчин күцәгч йосна элч эн үүл ик дааврта болҗахиг темдгләд, селәнә эдл-ахун, йиртмҗ харлһна, эдл-уушин әәмшг уга бәәдл тетклһнә төрмүд хаһллһна халхар улм шунмһаһар көдлхд урмд өгчәнә гив.
- Хальмг Таңһчин төлә мана әңгин көдлмш онц чинртә болна. Бидн өдр болһн селәнә эдл-ахун, фермермүдиг дөңнлһнә, мал асрлһна болн хөөнә ноос олзта-орутаһар хулдлһна, усна, селәнә һазрин делгрлтин, йиртмҗин көрң олзллһна болн нань чигн төрмүд хаһлнавидн. Сүл цагт бидн таңһчин төлә ик чинр зүүҗәдг төрмүд күцәмҗтәһәр хаһлҗ чадвидн. Кех көдлмш улм икдв, терүнәс иштә даавр чигн өсв, - гиҗ Хачира Борис темдглв.
Шин үүлд энүг батлснд Әрәсән Федерацин Ахлач Валентина Матвиенкод, энүнә негдгч дарук Андрей Яцкинд, әңгин ахлач Александр Двойныхд сенатор ханлтан өргв. Хальмг Таңһчин Толһач Хаска Батуд Борис Бекмуратович онц ханлтан медүләд, энүнд иткҗ дөңнснь таңһчин делгрлтин төлә үнн-чик седклтәһәр көдлхин халхар неквр тәвҗәнә.
ДАВАН Наталья

Видео