Шаңһа дем авхмн

Сегодня, 12:13 | Общество, Таңһчин зәңгс, Зіњг, Селәнә эдл-аху

Шидр селәнә эдл-ахун делгрлтин халхар төсв белдсн улс дунд зарлгдсн марһана аш диглгдв. Эн җил «Агромотиватор», цергә шишлң керг-үүлдврт орлцачнриг дөңнлһн болн фермерск эдл-ахун делгрлт гидг һурвн зөрүллтәр марһан болв. Таңһчин селәнә эдл-ахун министерствд бүрдәгдсн шишлң комиссь орҗ ирсн эрлһсиг шинҗләд, эврәннь кергән делгрүллһнә туст сән гисн төсв йилһҗ авв. Комиссин гешүд ут тоодан 172 эрлһ хәләв, марһанд орлцачнрин ик зунь эврәннь кергән эклх саната улс, дамшлтта фермермүд бас билә.
Комиссин шиидврәр 58 дииләч йилһгдв, тедн дунд цергә шишлң керг-үүлдврт орлцсн 11 ветеран шаңһа дем авх болв. Эн җил марһанд орлцачнрин кесгнь мал бордлһна эс гиҗ буудя хадһллһна бүрдәцс тосхлһна туск төсв белдҗ. Эврә эдл-аху бүрдәлһнд эс гиҗ делгрүллһнд эн җил 205 сай арслң йилһгдҗәнә. Келхд, эн җил йилһгдсн шаңһа демин кемҗән ниднәкәс 30 процентд ик болв. Диилвр бәрсн төсвс күцәгдснә ашт 150 көдлмшч орм бүрдәгдхмн гиҗ зуралгдҗана.

Мана зәңгч

Видео