Социальн бүрдәцд - шин көлгн

Сегодня, 12:03 | Общество, Таңһчин зәңгс, Зіњг

Хальмг Таңһчин залврин Ахлачин дарук Өлзәтин Марина таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян хойр Элстин социальн теткврин Герт одв. Дааврта һардачнр социальн бүрдәцин һардач Авән Анжелад шин көлгнә түлкүр бәрүлҗ өгв. Терүг «Автоваз» бүрдәц Хальмг Таңһчин Толһач Хаска Батун нилчәр йилһҗ өгсмн.

Авән Анжела таңһчин һардвр социальн бүрдәцин керг-төрмүдт оньган тусхаҗ, олн зүсн төрмүд хаһллһнд дөң-нөкд болна гиҗ темдгләд, көдләчнрин болн эрмдгтә бичкдүдин нерн деерәс ханлтан өргв. Энүнә келсәр, шин көлгн эднд ямр нег керг-үүлдврт орлцхд керглгдҗ, эрмдгтә бичкдүдт сән чинртә туслмҗ күргхд туслхнь лавта. Социальн бүрдәцин улд үүлддг «Иткл» ансамбльд орлцачнр ирсн гиичнрт билг-эрдмән үзүлв. Әрәсән марһаст диилвр бәрҗ, нер һардг ансамблин күүкд-көвүд ду-бииһәрн гиичнриг байрлулв. Өлзәтин Марина болн Нахошкинә Мингиян бичкдүдт ханлтан өргәд, эднә билг-эрдмиг өөдәнәр үнлв. Социальн бүрдәцин көдләчнр эрмдгтә бичкдүдт килмҗән тусхаҗ, эднә төлә сән таал тогтана гиҗ дааврта һардачнр темдглҗ, үнн-чик седклтәһәр көдлмшән күцәдг төләднь ханлтан өргв.
БАТАН Сәәхлә

Видео