Таңһчд моңһл кино үзүлв

27-04-2024, 15:16 | Таңһчин зәңгс » Зіњг

Шидр мана таңһчд Әрәсәд Моңһлын элчллтин сойлын халхар үүлддг атташе Чинбаяр Онон ирв. Моңһлын орн-нутг Хальмг Таңһчла ахнр-дүүнр болҗ үүрлдгнь нуувч биш. Тер учрар моңһл кино мана таңһчд үзүлснь ончта болв.
Хойр җил хооран «ЕврАзия Арт-Центр» бүрдәцин һардач Цагадинә Цевг Москвад кинон Герт «Хөөхө» («Кукушка») моңһл фильм хәләв. Терүнд фильм йир таасгдад, хальмг хәләһәчнр энүг эрк биш үзх зөвтә гиҗ ухалв. Седвәр орулҗ, эн җил нег һазра улс моңһл фильм үзснь тер. Эн керг бүтәлһнд Әрәсәд Моңһлын элчллтин сойлын халхар үүлддг атташе Чинбаяр Онон нилчән күргв.
– Моңһлын нертә режиссер Жамъянсүрен Жанчивдорж орс бичәч Валентин Распутинә «Последний срок» үүдәврәр дамҗад, «Хөөхө» нертә фильм цокч авсмн. Өрк-бүлин гешүд, өөрхн элгн-садн хоорндан ниитәһәр бәәлһн, эк-эцкән тевчлһн, үрдтән чик сурһмҗ өглһн фильмин һол күсл болна, – гиҗ олна үүлдәч, бичәч Цернә Василий цәәлһҗ келв.
Чинбаяр Ононан келсәр, йирдгч җилмүдт Моңһлд кинон делгрлт цаг зуур зогсв гиҗ келх кергтә, зуг сүл арвн җилин туршарт дәкнәс өргнәр экләд делгрлв. 2021 җилд Анапа балһснд «Киношок» XXXI кинонаадмд «Хөөхө» фильм дөрвн һол мөрәһәр ачлгдв. Иргчдән сән авъяст тохрад, Хальмг Таңһчд моңһл кинон Өдрмүд җил болһн бүрдәгдхд итклтә бәәнәв, гиҗ атташе келв.
Давсн хойр өдрин туршарт «Хууху» фильмиг Элстин, Троицкое болн Ергенинский селәдин хәләһәчнр үзв.
ОЛЬДАН Цаһан
Зургт: (зүн таласнь) Цагадинә Цевг, Чинбаяр Онон болн Цернә Василий

Видео