Месллһнә халхар дамшлтарн хувалцв

04-05-2024, 14:34 | Таңһчин зәңгс » Зіњг

Мөрн сарин 24-д Хальмг ик сурһульд месллһнә (хирургийин) төрәр регионмуд хоорндк хург болв. Энүнд Москван РУДН-ә, Хазна (Приволжск) шаңһа ик сурһулин, Әәдрхнә болн Дагестана, Рязань балһсна эмнлһнә ик сурһульмудын номтнр болн профессормуд цуглрв. Өдгә цагт кесг гемиг месллһ кеҗ эдгәнә, тер дамшлтын, өдгә цагт күцәҗәдг хамгин шин эв-арһсин тускар номтнр эврә илдклмүдтән келҗ өгв.

Таңһчин залврин Ахлачин дарук, социальн делгрлтин, күч-көлснә болн көдлмшәр тетклһнә министр Марина Ользятиева хургиг секәд, цуг орлцачнрт күцәмҗ дурдв. Хургин йовудт талдан регионмудын вузмудын номтнр дамшлтарн хувалцҗ, мастер-классмуд үзүлҗ, мана эмчнриг шин эв-арһсла тодрхаһар таньлдулв.
Хальмг ик сурһулин эмнлһнә дацңгин оютнр болхла, иргчдән ямаран салврар мергҗлтән өөдлүлхин тускар ухалҗ, эднд туста эрдм шүүҗ авхд туслв, гиҗ нәәлҗ болҗана. Тер мет ирсн номтнр һурвн өдрин эргцд Көтчнрә района эмнлһнд месллһ кеҗ дамшлтарн хувалцв. Тиим кевәр Хальмг ик сурһулин номтнр болн оютнр, райодын эмнлһсин мергҗлтнр мана тал ирсн номтнрла нөкцлтән өргҗүлҗ, туста медрл хоршав.
Цааранднь Хальмг ик сурһулин һардач Бадм Салаев номин шинҗллтин, таңһчин залврла күцәҗәдг олн халхин нөкцлтин тускар тодрхаһар келҗ өгв. Эмнлһнә дацң секгдснә хөөн эн салврин ик сурһульмудла бәрдг нөкцлт өргҗәд бәәнә гиҗ Бадм Катинович темдглв.
Дарунь Көтчнрә района эмнлһнә ах эмч Очр Бадма-Гаряев үг авч, талдан регионмудын вузмудын номтнрла күцәҗәдг нөкцлтин тускар тодрхаһар келҗ өгв. Түүнә ашт хирургийин хамгин шин эв-арһ олзлдг болв.
Өдгә цагт тиим нөкцлтин төлә улм сән таал тогтагдҗана, шин кергсл районд болн таңһчд улм өргнәр олзлгдҗана. Райодын болн селәнә эмчнрин җалвинь өөдлүлхлә, көдлмшин таалынь ясрулхла, шин кергсл орулад бәәхлә, тер нөкцлт улм өсәд-өргҗәд йовх. Таңһчин райодын эмчнр Көтчнрә района эмнлһнд ирҗ, өдгә цагин дамшлт хоршаҗана, тер көдлмшиг бас өргҗүлх кергтә. Ода хальмг ик сурһульд эмнлһнә дацң секгдснә хөөн нөкцлт цааранднь өсәд бәәх, сән медрлтә, өдгә цагин эв-арһ меддг эмчнриг белдлһнд тер хамцу үүлдвр туста болхнь лавта, гиҗ Көтчнрә района эмнлһнә ах эмч темдглв.
Цааранднь ирсн гиичнр илдклән соңсхв. Тер тоод хаалһд зеткртә йовдлд авсн шавиг яһҗ түргәр эмнхин, месллһ яһҗ кехин тускар Хазна ик сурһулин профессор, эмнлһнә номин доктор Андрей Анисимов келҗ өгв.
Геснә гемиг месллһнә эв-арһар яһҗ эмнхин тускар Дагестана эмнлһнә ик сурһулин профессор Мухума Магомедов цәәлһвр өгв.
Тер мет талдан нәрн гемиг месллһнә эв-арһар яһҗ эмнхин туск өдгә цагин дамшлтарн Москван РУДН-ә ик сурһулин профессор, эмнлһнә номин доктор Мария Навид, профессор, номин доктор Андрей Протасов хойр дамшлтарн хувалцв.
- Йирин эрүл-менд харлһна салврт ик сурһульмудын эмнлһнә дацңгуд хамгин ик чинр зүүнә, эдн хоорндан нөкцлтнә, сән мергҗлтнриг белднә. Эн кергт Әәдрхнә эмнлһнә ик сурһуль Хальмг ик сурһульла кесг җилин туршарт нөкцлтән күцәҗәнә, шин дацңд эмчнриг белдхин төлә дөңгән күргҗәнә. Эмнлһсин болн ик сурһульмуд хоорнд сән залһлдан бәәх зөвтә, тиим кевәр эмнлһнә чинрнь өөдлнә. Тер мет таңһчин эрүл-менд харлһна үүлдврнь ясрад батрна.
– Эн хургин йовудт бидн мастер-классмуд давулад, эмчнриг шин эв-арһсла таньлдулвидн. Хальмг ик сурһулин лабораторьмуд сән кергсләр теткгдсн бәәнә, талдан шин тоот чигн хулдҗ авгдх, тегәд шинҗллтин кемҗән өсәд бәәх, тиим кевәр тана таңһчд эмнлһнә чинрнь өөдләд бәәхнь лавта, – гиҗ Әәдрхнә ик сурһулин хирургийин тиңкмин номин көдләч Андрей Топчиев келв.

ТҮРВӘН Һуна
Месллһнә халхар дамшлтарн хувалцв
Месллһнә халхар дамшлтарн хувалцв
Месллһнә халхар дамшлтарн хувалцв

Видео