Үр-иньгин таалд болсн харһлт

04-05-2024, 14:55 | Таңһчин зәңгс » Зіњг

Одахн мана таңһчд Әрәсәд Моңһл орн-нутгин элчллтин сойлын халхар үүлддг атташе Чинбаяр Онон ирсн билә. Хальмг Таңһчд моңһл кинон өдрмүдин давулгдсна йовдлд эн орлцв.
Моңһл улс Хальмг Таңһч хойр ахнр-дүүнр болсн учрар әдлхн тууҗта, келтә, сойлта болдг. Хальмгт бәәсн кемдән Чинбаяр Онон Хальмг Таңһчин залврин Ахлачин негдгч дарук Цернә Эрдньлә харһв (зургт). Терүнә йовудт сойлын, кинематографин, моңһл болн хальмг бичәчнрин хамцу хураңһу һарһлһна, Улан Баатр балһснд хальмг утх-зокъялчнрин дегтрмүдин һәәхүл бүрдәлһнә болн ирлцңгү кесг төрмүдәр күүндвр болв. Иргчдән ахнр-дүүнр болгч нутгуд нөкцлтин халхар кесг төсвс күцәхәр үгцв. Темдглхд, өөрхн иргчд Моңһлын нертә режиссер Жамъянсүрен Жавчивдорж мана таңһчд ирҗ, олн-әмтнлә харһҗ, моңһл-хальмг фильм цокч авхин туст седвәр орулгдв. «Калмыкия» таңһчин зәңгллһнә агентствд болсн харһлтд «Евразия-Арт-Центр» бүрдәцин һардач Цагадинә Цевг болн олна үүлдәч, бичәч Цернә Василий, хальмг олн-әмтнә шүлгч Нуура Владимир, тууҗин номин доктор, Б.Б.Городовиковин нертә Хальмг ик сурһулин профессор Җаган Ольга, таңһчин ачта артист Бурлака Эдуард болн таңһчин седкүлчнр орлцв.
Харһлтын йовудт таңһчд моңһл кинон Өдрмүдин йовудт үзүлсн «Хөөхө» фильмин тускар келҗ, терүг шинҗлҗ үнлв. Чинбаяр Онон бийиннь тускар бас келҗ өгв. Эн олна үүлдәч, утх-зокъялч, орчулач, бичәч, седкүлч болна. Әрәсәд А.М.Горькийин нертә утх-зокъялын күрәлңд сурһуль сурсмн. Моңһл орн-нутгтан кесг җилдән седкүлчәр көдлҗ йовла. Өдгә цагт Моңһлд ямаран газетмүд, седкүлмүд һардгинь, телеүзл яһҗ көдлҗәхинь Чинбаяр Онон бас тодрхаһар цәәлһҗ келв. Әрәсәд Моңһл орн-нутгин элчллтин сойлын халхар атташен үүлиг эн җил шаху дааҗана. Энүнә келсәр, сул цагтан эн дегтрмүд бичнә, үүдәврмүдиг орчулна, утх-зокъялд дурта болҗахан темдглв.
Хальмгин олн-әмтнә шүлгч Нуура Владимир Моңһлд утх-зокъялчнрин дегтрмүд барас һарһлнд ямр оньг тусхагддгинь күндтә гиичәс сурв.
– Өдгә цагт Моңһлын бичәчнрин ниицәнә ханьд 800 һар гешүн орна. Мана орн-нутгт утх-зокъялчнрин өөрхн элгн-саднь, үр-иньгүднь, нег һазра улснь нөкд болҗ дегтрмүднь барас һарһна, – гиҗ Чинбаяр Онон келв.
Таңһчин седкүлчнрин сурврмудт гиич бас хәрү өгч, цааранднь нөкцлтин халхар үүлдхдән белн бәәхән медүлв. Харһлт үр-иньгин таалд давв.

КАРСАНА Евгения

Видео