Орн-нутгин делгрлтд туслх

04-05-2024, 14:57 | Таңһчин зәңгс » Зіњг

Хальмг Таңһчин Улсин Хуралын (Парламентин) Ахлач Артем Михайлов Санкт-Петербург балһснд болсн Әрәсән зака үүдәчнрин Хүүвин сүүрт орлцв. Эн керг-үүлдвр Таврическ бәәшңд болв. Терүнд Әрәсән Президент Федеральн Хургт кесн Илгәврин медлд нилхд төрлһиг икдүллһнә, бичкдүдиг асрҗадг өрк-бүлмүдиг дөңнлһнә, «Селәдин делгрлт» гидг шаңһа көтлврин медлд селән һазрт сән таал тогталһна төрмүд хәләгдв.
Харһлтд Әрәсән Федерацин Хүүвин Ахлач Валентина Матвиенко орлцад, орн-нутгин толһачд суңһгдсн Владимир Путина инаугурац хөн сарин 7-д болх гиҗ зуралгдҗана гив. Эн керг-үүлдвр өөрхн зурһан җилин эргцд мана орн-нутгин үлмә уга делгрлтин кем болхмн. Әрәсән делгрлтин һоллгч зөрүллтсиг Президент Федеральн Хургт кесн Илгәврт заав, терүнд һол күсл, то-диг болн күцәмҗин аш батлгдсн бәәнә, гиҗ Федерацин Хүүвин Ахлач эврәннь үгдән темдглв.
- Эн чинртә төрмүд күцәмҗтәһәр болн дигтә-даратаһар күцәгдхин төлә күцәгч болн зака үүдәгч йосна бүрдәцс хамцу үүлдҗ, арһ-чидлән негдүлх зөвтә. Бидн хамдан ниитәһәр көдлҗ, нөкцлтин делгрүлх зөвтәвидн. Эндрк цаг маднас шинрлт некҗәнә. Зака үүдәчнрин Хүүвин сүүрт орлцачнр ухан-тоолвран медүлҗ, дамшлтарн хувалцҗ, регионмудыг үүмүлҗәх төрмүдиг залврт күргҗ медүлхд туслҗана, – гиҗ Валентина Матвиенко келв.
Таңһчин Улсин Хуралын Ахлач Артем Михайлов социальн политикин комиссин сүүрт орлцв. Терүнд өрк-бүлмүдиг дөңнлһнә керг-үүлдврмүдин, тер тоод экин сертификатыг олзллһна, нилхд төрлһиг урмдуллһна төрмүд босхгдв. Артем Михайловин темдглсәр, сүүрт хәләгдсн төрмүд орн-нутгин иргч делгрлтин һоллгч төрмүд хаһллһнд нерәдгдв.
БАТАН Наталья
ЗУРГТ: Хальмг Таңһчин Улсин Хуралын (Парламентин) Ахлач Артем Михайлов (зүн бийәснь һурвдгчнь) Әрәсән зака үүдәчнрин Хүүвин сүүрт орлцачнрла

Видео