Элстин багш Пүрбән Адьян диилвр бәрв

04-05-2024, 15:01 | Таңһчин зәңгс » Зіњг

Шидр Элстд «2024 җилин Хальмг Таңһчин йилһән сән багш» гидг марһана ашнь диглгдв. Түрүләд багшнр эврә сурһулин, дәкәд района, аштнь таңһчин кемҗәнд дөрлдәд, эврә билг-эрдмән, дамшлтан, шин эв-арһс яһҗ олзлдган медүлв. Эднә кичәлмүдиг Аһшин, Сарпулин, Әәдрхнә, Дагестана багшнр болн номтнр, Әрәсән марһана дииләчнр үнлв. Эн җилин марһан академик Эрднин Пүрвән үүдәсн УДЕ-н эв-арһ делгрүллһнә төрәр болв.
Байрин хургт цуглрсн багшнриг болн марһанд орлцачнриг таңһчин залврин Ахлач Босхмҗин Гилән йөрәҗ, багшнрин тоомср җил ирвәс өөдләд йовхиг темдглв.
– Йилһән сән багшнрин марһанд орлцдг дииләчнрин болн лауреатнрин мөрән кемҗән кесг холванд өсв. Дөрлдәнд билг-эрдмән үзүлсн цуг багшнр өөдән дамшлтан, гүн медрлән, эв-дован үзүлҗ йилһрв, таднд цугтадтн күцәмҗ дурдҗанав, – гиҗ Гилән Герасимовна нүр үгдән келв.
Дарунь долан халхд марһана дииләчин өөдән нериг зүүсн багшнрт күндллһнә тасм болн дипломс, мөңгнә сертификатмуд бәрүлҗ өггдв. Элстин эсвин багш Адьян Валериевич Пюрбеев таңһчин йилһән сән багшин өөдән нер зүүв. Төрскн келнә болн утх-зокъялын багшнр дунд дииләчнь Элстин 2-ч тойгта дунд сурһулин багш Надежда Менкеевна Канаева болв.
Тер мет Троицкое селәнә «Алтн түлкүр» бичкдүдин садын сурһмҗлач Ольга Анатольевна Бадминова дииләчнрин тоод бас орв. «Төрскн кел делгрүллһнә хамгин сән дамшлт» гидг халхар Элстин 24-ч тойгта бичкдүдин садын немр сурһулин багш Екатерина Николаевна Балакаева түрүн орм эзлв.
Цааранднь «Зүркән бичкдүдт өгчәнәв» гидг немр сурһулин багшнр дунд болсн марһанд Үстин района Цаһан Амна 2-ч тойгта дунд сурһулин немр сурһулин болн эклц классин багш Татьяна Исатаевна Чензеева ончрв. Тер мет колледжмүдин багшнр «Җилин эрдмч» гидг марһанд орлцв. Элстин хулд-гүүлгәнә-технологин колледжин багш Анна Сергеевна Дженгурова диилвр бәрсинь темдглхмн.
Баһ наста багшнр бас марһлдв. Целинн района Троицкое дунд сурһулин эклц классин багш Гиляна Викторовна Кутушова гүн медрлән үзүлҗ дииләчин нер зүүв. Эдниг йөрәҗ таңһчин залврин Ахлач Босхмҗин Гилән дипломсинь болн дииләчин тасмсинь бәрүлҗ өгв.
Диилвр бәрсн цуг багшнр Цугәрәсән марһанд орлцхмн. Тер мет таңһчин марһана лауреатнр болн призермүд байрин хургт мөңгнә сертификатар, дипломсар, белгүдәр ачлгдв. Эдниг Хальмг Таңһчин Улсин Хуралын (Парламентин) депутат Хачирә Борис, Б.Б.Городовиковин нертә Хальмг ик сурһулин һардач Салан Бадм, сурһуль-эрдмин көдләчнрин таңһчин профсоюзин һардач Коокун Антонина йөрәҗ, дипломсинь болн белгүдинь бәрүлҗ, улм өөдән күцәмҗ дурдв.
Багшнр олнд туста, ик көдлмш кеҗ, сурһульчнрин мөңгнә туск медрлиг гүүдүлнә, гиҗ келсн үгдән Әрәсән Төв банкин Өмн үзгин һоллгч заллтын әңгин-Хальмг Таңһчин Келн-улсин банкин залач Аслан Медалиев темдглҗ, тер үүлдвриг йилһән сәәнәр күцәдг Элстин 12-ч тойгта сурһулин коллективд белгән нерәдв.
Байрин хургин йовудт таңһчин нертә артистнр болн коллективс билг-эрдмәрн байрлулв.
ТҮРВӘН Һуна
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв
Элстин багш Пүрбән Адьян диилвр бәрв

Видео