Җирһлин төлә әмән әрвлсн уга

07-05-2024, 15:21 | Общество, Зіњг, Сойл

Тавн җилин эргцд Гучиновихн олн зүсн аюл уга келһнд орлцачнрин туск материал болн зургуд цуглулҗ, эднә өрк-бүлмүдлә харһад, аһу ик көдлмш күцәв. Хәәврин көдлмшт таңһчин сурһульмудын багшнр болн сурһульчнр ик дөң-тусан күргв. Аштнь эн дегтрт 520 күүнә җирһлин, залу-зөрмгин туск келвр орв. Чернобыльд болсн аюл эргндк йиртмҗд ямаран ик харшлт күргсиг герчлҗәдг зургуд дегтрт олзлгдв. «Чернобыль бичкдүдин нүдәр» гидг зургудын марһанд орлцсн күүкд-көвүдин зургуд эн дегтрт бас орснь темдгтә. Дорас өсч йовдг баһ үйин элчнр нег һазра улс залу-зөрмгән үзүләд, иим ик аюл уга келһнд орлцсна тускар медх зөвтә. Дәкәд эн дегтрт Чернобыльд болсн аюл уга келһнд орлцсн улст нерәдгдсн шүлгүд орв.
- Эн дегтриг бидн тавн җилдән белдәд, барлхин төлә мөңг хәәһәд, кесгтән эн өдриг күләввидн. Һундл төрхд, эн җилмүдин эргцд зун шаху күн сәәһән хәәһәд, дегтриг үзҗ чадсн уга. Зәрм регионмудт чернобыльцнр һурвн-дөрвн дегтр барлсн бәәнә. Эн дегтр барас һарснь маднд ик байрта йовдл болҗана. Бидн таңһчин сурһульмудт болн дегтрин саңгудт эн дегтриг белглхвидн. Энүг белдәд барлхд дөң-тусан күргсн цуг улст зүркни ханлтан өргҗәнәв, - гиҗ Борис Букиевич харһлтыг нүр үгәр секч келв.
Дегтр барт белдсн цагт Һучна Борис кесг улсла харһҗ күүндв. Эднә тодлврмуд соңсад бичҗ авсна хөөн тер күнд цаг уханд орад, кесгтән унтҗ чадлго зовснаннь тускар эн хувалцв. Нәдвдә Михаил Семипалатинск полигонд болсн керг-үүлдврт орлцсна хөөн күнд кевәр гемтәд, удан цагт ухан-сегән уга бәәһәд, нүднь сохрад, арвн җилдән орнасн босч чадлго зовсмн. Энүнлә харһсна хөөн һурвн өдртән нөр уга бәәһәд, ямаран ик зовлң эдлҗәхинь үзсм чееҗин өвдкүр болв, гиҗ Борис Букиевич келв. Тиигәд, харһлт болһн, күн болһна тууҗ энүнә зүркинь көндәв. Галина Николаевна авальдан дөң болад, бичсн цуг тоотынь умшад, дигләд, барт белдв. Энүнлә хамдан кесг өдртән бас амрл угаһар, эн әрүн чинртә керг күцәхд ик омг өгсмн.
Шин дегтрин презентацд орлцсн Басңга Иван, Михайла Батыр, Манҗин Андрей, Сельгикә Валерий, Бадендән Сергей, Кензән Киштә болн нань чигн улс Чернобыльд болсн аюл уга келһнд орлцачнрин ач-тусин, залу-зөрмгин тускар келәд, эднә санл мөңкрүлх, баһчудт эднә тускар келҗ медүлх кергтә, гиҗ темдглв. Тер цагт эдн Украинә һазрт болсн аюл уга келһнд орлцҗ, әмән әрвллго зөрмгән үзүлсмн. Тиигхд бидн нег орн-нутг бәәсмн. Эндр эднә көвүд, ачнр цергә шишлң керг-үүлдврт орлцҗ, бас баатрлг кевәр дәәлдҗ йовна. Харһлт үр-иньгин таалд давв, чилгчднь түүрвәчнр цугтаднь дегтрән белглв.
ДООҖАН Наталья
ЗУРГТ: дегтрин презентацд орлцачнр
Җирһлин төлә әмән әрвлсн уга
Җирһлин төлә әмән әрвлсн уга

Видео