«Эндр би зурачв»

16-05-2024, 13:20 | Общество, Таңһчин зәңгс, Зіњг, Сойл

Иим нертә һәәхүл Элстд «Арт Эрдэни» гидг галерейд секгдв. Терүнд зурлһна эрдмд түрүн ишкдлән кеҗәдг зурач Дима Бараевин зургуд үзүлгдҗәнә.
Баһ наста зурач эн һәәхүлд тәвгдсн 40 һар зурган багш болн сурһмҗлач Басң Чурюмовин дөңгәр зурҗ белдсмн. Дима Бараев багшин мастер-класст орлцҗ, эрдмин сән медрл авчана. «Дима талдан күүкд-көвүдәс йилһрнә. Энтн өвәрц үрн болҗана. Юм зурхдан дуртаһинь генткн медҗ авсмн. Зурх седкл көвүнд бәәхинь Басң Чурюмов медв. Эдн өрк-бүләрн үүрлнә. Басң көвүг бичкнәснь меддг. Тегәд Димад зурдг дасххар, энүнлә күүндәд, көвүнд тернь таасгдад, кичәлмүд эклсн билә. Тиигәд зурлһна дөңгәр көвүнә тааста эрдмнь илдкгдв, дәкәд болхла, энүнә эрүл-менднь зөвәр ясрв. «Эн икәр үүмдгән уурв. Үг келхләрн, тетндгән уурад, адһм угаһар ухалад келдг болв», – гиҗ Диман эк Байрта ухан-тоолврарн хувалцна.
«Зург зурҗасн цагтан Дима төрүц талдан болҗ одна. Чирәнь герлтәд, инәмсклсн эн бәәнә. Эннь мадниг байрлулна. Экнь тер кемиг видеод цокч авна, – гиҗ көвүнә эцк Эрнҗән седклән медүлҗ келв. – Тер видеог хәләһәд, зургуд яһҗ төрҗәхинь үзнәв. Түрүн авгтан көвүнә зурсиг Басң чикләд, ясдг болх гиҗ сандг биләв. Дарани нег зург Дима экләд зурхлань аштнь юн болҗ зургт тодлгдх гиҗ алмацҗалав. Көвүн ухалсан зургт үзүлҗ чадсиг, багшнь зуг заавр өгәд, зәрм тоотынь чик хәәврүр залдгинь медүв. Терүнәс давад, Дима багшлаһан зургин ширин болн өңгин тускар зөвшәрлго, эврәһән келәд бәәснь нанд тодлгдв. Зурлһна эврә хәләцтә болҗахинь медүв. Көвүнә билгиг үзҗ, чик кевәр терүг залҗ, эрдм дасхҗахднь би Басңд үнн седкләсн ханҗанав».
«Эн туст шишлң эв-арһ гиҗ нанд уга. Эн көвүнлә би наадк күүкд-көвүдлә әдл кичәл давулнав. Зааһад, келҗ өгнәв, үзүлнәв. Эн көвүн билгтәнь зургудаснь медгднә», – гиҗ багш болн зурач Басң Чурюмов келнә. Эн көвүн талдан күүкд-көвүдәс йилһрнә, гиҗ деер келгдлә. Дима үг келдго бәәсмн. Тегәд зургудын дөңгәр көвүн ухан-тоолвран медүлҗ чаддг болв. Билгтә Дима Бараев ямаран гүн ухата болн соньн тоолвртаһинь медҗ авхин төлә «Арт Эрдэни» галерейд ирҗ, зургудынь хәләтн.

ҖИРҺЛИН Кермн
«Эндр би зурачв»
«Эндр би зурачв»

Видео