Хальмгин зөргтә күүкд улст нерәдв

Төрскән харсгч Алдр дәәнд орлцсн күүкд улст нерәдсн керг-үүлдвр Н. Пальмовин нертә Келн-улсин музейд болв. Дәәнд орлцсн күүкд улсин тускар келҗ өгчәх харһлт санлын олн керг-үүлдврмүдин йовудт болснь темдгтә.

Хальмг Таңһчас олн күүкд улс дәәнд орлцҗ, залу улсла зергдән төрскән харссмн. Теднә туск байн тоот музейд хадһлгдсн бәәнә. Зөргтә күүкд улс әмд-менд бәәхд кегдсн харһлтсин туск тодлврмуд болн зургуд музейд болдг керг-үүлдврмүдт олзлгдна. Элстин хулд-гүүлгәнә - технологическ колледжин оютнр дәәнә кесг керг-үүлдврт орлцҗ, зөргтә кевәр дәәлдҗ йовсн хальмг 800 күүкд улсин тускар келҗ өгв. Теднәс кесгнь Дәәнә-Теңгсин Флотд церглҗ йовла. Аһариг хортнас харлһна цергт чигн, партизанск отрядт чигн хальмг күүкд улс церглсмн. Дәәнә һалд хортна сумнла харһсн цергчнриг дәәлдәнә һазрас һарһҗ авч, эмнлһнд чигн олн күүкд улс әмән әрвллго йовсинь цугтан меднә.
Тамара Хахлынова, Раиса Веткалова, Мария Саранова, Бамба Тимошкаева, Вера Иванова, Нюдля Паляева, Наташа Качуевская болн зөргәрн ончрсн нань чигн олн күүкд улсин нерд болн эднә баатр үүлдвр Төрскндән цергллһнә үлгүр болв. Эднә нердиг балһсна уульнцс болн сурһулин бүрдәцс зүүнә. Харһлтын йовудт музейин көрңд бәәдг фильмс чигн олзлгдв.
«Эндр би соньн олн тоотыг медҗ авув, - гиҗ негдгч курсин оютн Анджелина Цеденова келнә. - Дәәнд орлцсн хальмг күүкд улсин туск видеолекц нанд йир икәр таасгдв. Тиим әәмшгтә цагт эдн юмнас әәлго дәәлдснь медхд чигн амр биш».
«Хальмг күүкд улс дәәнд зөргтә кевәр дәәлдсинь би ода йир сәәнәр медҗ авув. Эн күүкд улсин тускар онц келвр бичҗ болхмн. Алдр Диилврт таңһчин күүкд улс зөвтә тәвцән орулснь нанд ик бахмҗта» – гисн тоолвран хойрдгч курсин оютн Бадма Эрендженов медүлв. Келхәс, эн көвүн Басан Бадьминович Городовиковин җичнь болҗана.
Тиигәд Келн-улсин музейд болсн эн харһлт дәәнд орлцсн хальмг күүкд улсин санлыг күндлсн деерән сурһмҗин ик чинртә болв.

ҖИРҺЛИН Кермн