Зөргтә дәәч Алтн Музаевин нерн мөңкрүлгдв

Төрскән харсгч Алдр дәәнд Диилвр бәрснә 79 җилин өмн өргнд Хальмг ик сурһульд инженерин-технологин дацңгиг төгсәсн, гвардин баһ сержант Алтн Музаевин санлынь тевчҗ неринь мөңкрүллһнә самбр секгдв. Инженерин-технологин, талдан дацңгудын оютнр, багшнр, Хальмг ик сурһулин һардачнр эн керг-үүлдврт орлцв. Һучн нәәмтә дәәч орн-нутган харсч, цергә шишлң керг-үүлдврт орлцад, 2023 җилин һаха сарин 1-д күнд шавас көлтә Запорожск мүҗин һазрт әмнәсн хаһцла.
Зөргтә дәәч Алтн Музаевин санлд нерәдсн самбриг экнь Мария Нюкеевна Музаева, авальнь Марина Владимировна Огорельцева, авһнь Валентин Музаев, элгн-саднь секч цецгүд тәвв.
- Гвардин сержант Алтн Музаев әмән әрвллго Төрскән харссмн, эврә дәәч кергән чадмгар күцәҗ йовла. Алтн Музаевиг Хальмг ик сурһульд, мана таңһчд, орн-нутгт чигн мартшго, – гиҗ ик сурһулин һардачин дарук Эльза Мантаева митингд келв.
Алтн Музаев Ик Буурла района Орһахн селәнд 1985 җилин така сарин 18-д һарсмн, эцкнь Иван Манцаевич хальмг келнә багшар, экнь Мария Нюкеевна дегтрин саңд көдллә. Алтн Ик Чонса селәнә болн Элстин 3-ч тойгта сурһульмудт сурла, 2002 җилд Хальмг ик сурһульд орад, 2007 җил терүг төгсәһәд инженер-тосхач болсмн.
Хальмг ик сурһульд сурлһна кемд Алтн номин-шинҗллтин көдлмш күцәҗәлә, талдан оютнрла олна үүлдврт орлцҗала, гиҗ багшнрнь, инженерин-технологин дацңгин һардач, техникин номин доктор, профессор Валерий Андреевич Эвиев болн теднә багин һардач, доцент Виктор Аджиевич Онкаев тодлв.
Ик сурһулян төгсәһәд, әәрмд цергләд, Элстд цаг-зуур көдлҗәһәд, 2012-2022 җилмүдт Алтн Иванович Санкт-Петербург балһсна Адмиралтейск района тосхлтын жилищн-коммунальн бүрдәцд эрдмәрн көдлҗәлә. 2022 җилин хулһн сарин 22-т эн цергә шишлң керг-үүлдврт орлцв. Түүнә өмн Алтн десантник болҗ Өмн үзгин Осетьд болҗасн цергә дәәлдәнд орлцла. Залу-зөрмг кевәр дәәлдснә төлә Әрәсән харслтын министерствин «Йилһән сән дәәч үүлдврин төлә» гидг медаляр ачлгдла. 15 җил болад, ВДВ-н Псковин әңгд дамшлтан сергәснә хөөн десантник Алтн Музаевиг шишлң цергә керг-үүлдврт йовулв.
Энд Алтн Иванович Суворовин нертә Черниговск 76-ч десантын дивизин ханьд 237-ч тойгта полкд церглв, Кременная-Сватово һазрт, ЛНР-т Төрскән харсчасмн.
Зөргтә дәәч Алтн Музаев ЛНР-ин болн Запорожск һазрт яһҗ дәәлдҗ йовсна тускар Хальмг Таңһчин Улсин Хуралын (Парламентин) депутат, «Төрскән харсачнр» саңгин әңгин һардач Очр Халгаев, Ик Буурла болн Приютна райодын цергә комиссариатын әңгин һардач Андрей Горяев, Алтнла хамдан ик сурһульд сурч йовсн Андрей Абушинов келҗ өгв.
Гвардин баһ сержант Алтн Музаев эднә взводын командир әмнәсн хаһцхла, түүнә ормд дәәлдлә. Цергә даалһвриг йилһән сәәнәр күцәснә төлә Алтн Иванович Алдр Диилврин 78-ч җилд нерәдсн Санкт-Петербургин Бәәшңгин талвңд болсн парадт орлцла.
2023 җилин така сард цергә нег үүлдвр күцәснә төлә Алтн Музаев Залу-Зөргин орденәр ачлгдла. Тер өөдән ачлвриг Алтн Ивановичд болн түүнлә хамдан церглҗәсн салдсмудт дивизин командир, Әрәсән Баатр, генерал-майор Денис Шишов дәәлдәнә һазрт бәрүлҗ өглә.
Бас тер җилин ноха сарин 20-д Алтн Музаевиг үүрмүдтәһинь Запорожск мүҗд йовулв. Работино селәнә өөр болсн дәврлһнә йовудт түүнә һардҗасн әңг хортна кесг БМП уга кев. Болв һаха сарин 1-д болсн догшн дәәлдәнә йовудт гвардин баһ сержант Алтн Музаев күнд шав авад, әмнәсн хаһцв. Дәәч зөргтә үүлдврин төлә Алтн Ивановичиг Залу-Зөргин орденәр ачлсн болдг.
Зөргтә дәәчин, чадмг командирин, көвүнәннь, авалин санлыг Хальмг ик сурһульд, өрк-бүлднь әрүнәр хадһлҗана. Өсч йовх үйнрт, цергч болхар седҗәдг арвтнрт Алтн Музаевин җирһлнь болн дәәч үүлдврнь сән үлгүр болхмн.
ТҮРВӘН Һуна