«Буйн» саңгин буйнта керг

«Бурхн Багшин Алтн сүм» Хальмгин төв хурлд «Буйн» гидг саң өрк-бүлин нарт-делкән Өдрт нерәдҗ буйнч седклин керг-үүлдвр бүрдәв. «Буйн – өрк-бүлмүдт» гидг керг-үүлдврин медлд олн үртә, баһ тетквртә болн җирһлин күнд таалд туссн 102 өрк-бүлд дөң күрггдв, теднә тоод шишлң цергә керг-үүлдврт орлцачнрин 42 өрк-бүл бас орв. Эдн цуһар таңһчин әмтнә социальн теткврин төвин «Өрк-бүл» гидг әңгд социальн туслмҗ авна.
«Буйн» гидг саң нәәмн җил хооран Санан гелңгин седвәрәр бүрдәгдсмн, эн җилмүдин эргцд эдн таңһчин әмтнә социальн теткврин төвлә бат залһлда бәрҗ үүлдҗәнә. Олн үртә, баһ тетквртә өрк-бүлмүд җил болһн эн саңгин дөң-тусар хот-хоолар, хувцар, канцелярск эд-таврар теткгднә. Эн җил мана орн-нутгт өрк-бүлин Җил зарлгдсн бәәнә, тегәд терүнд нерәдҗ эн буйнч седклин керг-үүлдвр бүрдәгдсмн. Өрк-бүлмүдт хот-хол, ааһ-сав, хувцн, бичкдүдт сурһульднь кергтә эд-тавр болн наадһас бәрүлҗ өггдв.
Хальмгин төв хурлд болсн керг-үүлдврт орлцачнриг «Буйн» саңгин ахлач Санан гелң өрк-бүлин нарт-делкән Өдрлә йөрәһәд, эн харһлт дигтә Үрс Сарла болснь темдгтә йовдл мөн гив. «Үрс Сарла цаһан сана-седкл зүүҗ, буйнта керг күцәҗ, баһ тектвртә, уга-яду улст дөңгән күргҗ, чик авг-бәрцәр бәәх кергтә. Тер цагт тана буйн делгрәд йовх», – гиҗ Санан гелң келв. КЦСОН-а һардачин дарук Светлана Хинеева өрк-бүлмүдин нерн деерәс буйнта керг бүрдәсн саңд ханлтан өргҗ, эднә күцәҗәх үүлдвр цаһан хаалһта болхиг дурдв.
- Мана төвд туслмҗ авдг олн үртә өрк-бүлмүдт дундлад тавн-зурһан үрн бәәнә. Насни дигт күрәд уга олн бичкдүд асрхд, тедниг сәәнәр хувцлхд, шимтә хот-хол өгхд зөвәр күнд, тегәд буйнч седклтә улс эднд дөң болдгнь темдгтә. Мана төвд бичкдүдин төлә олн зүсн кичәл болна, кружокмуд үүлднә, эк-эцкнрин төлә психологуд олн төрәр күүндвр давулна. Җирһлин күнд таалд туссн улст дөң күргдг улс болн бүрдәцс баһ биш бәәнә. «Буйн» саң болн төв хурл мана өрк-бүлмүдиг оньгасн алдхш, җил болһн дөңгән күргнә. Ямр нег керг-үүлдвр болхла, хурл эднд аршанас шикр-балта, үс, тос, зер-земш өгнә. Эн мана харһлт өрк-бүлин нарт-делкән Өдрлә болн Үрс Сарла болснь хойр дам байрта болв, – гиҗ Светлана Владимировна келв.
Өрк-бүлмүд «Буйн» саңгин ахлач Санан гелңд болн социальн теткврин төвин һардврт ханлтан өргҗ, эднә килмҗ болн цаһан седкл эднд урмд өгнә гив. Дөрвн үртә Байрта Ходжинован келсәр, ууһн күүкнь төвд болдг керг-үүлдврмүдт шунмһаһар орлцдг бәәсмн, билг-эрдмән делгрүлҗ кружокд ордг билә. Күүкн бичкндк цагтан шаврар кегдлмүд кедг багд ордг билә, хөөннь эн билг-эрдмин колледж төгсәв, ода сойлын ик сурһульд сурчана. Дөрвн үрнь социальн теткврин төвд сурһуль сурад, билг-эрдмән делгрүләд, буйнч седклин керг-үүлдврмүдин медлд дөң авв. Олн үртә өрк-бүлмүд буйнч седклин улсин оньгт бәәнә, эднә килмҗ ик омг өгнә гиҗ күүкд күн темдглв.

ДООҖАН Наталья
ЗУРГТ: «Буйн - өрк-бүлмүдт» гидг керг-үүлдврт