Хальмг шүлгләнә делкәд

Хаврин цаг шүлгүд умшх седкл зүүлһдгинь кен эс меднә. А. Амр-Санана нертә Келн-улсин дегтрин саңгин көдләчнр йиртмҗ серҗәх сәәхн цагла шүлгүд умшдг билгтнрин марһа зарлна. Эн җилин марһан бамб цецгин наадмин кемҗәнд болснь темдгтә. Бас нег ончнь шүлгүд эн җил өөнән темдглҗәдг хальмг бичәчнрин үүдәврт нерәдгдв.

Хальмг Таңһчин сойлын болн зуульчллһна министерствин кемҗәнд А. Амр-Санана нертә Келн-улсин дегтрин саң бүрдәсн марһан шүлгүдт дурта баһ наста олн умшачнрин соньмслт үүдәв. Марһанд орлцсн күүкд-көвүд, ик зуудан дунд сурһулин бүрдәцсин сурһульчнр болв. Бүкл сара хонгин туршарт бембә өдр болһн Көглтин Даван бумбин өөр сурһульчнр цуглрҗ, хальмг болн орс келәр шүлгүд умшҗав. Шүлгүдт дурта әмтн таңһчд баһ биш бәәхинь марһан медүлв. Ут тоодан терүнд 266 күн орлцҗ, дурта шүлгүдән умшҗ, әмтнә чикнә хуҗр хаңһав. Шүлгүд умшсн улсин билгинь жюри үнлҗ, дииләчнриг йилһв. Әрәсән бичәчнрин ниицәнә Хальмг региональн әңгин ахлач, шүлгч Татьяна Бадакова, Хальмг Таңһчин сойлын ачта көдләч, бичәч Эрднь Канкаев, Басңга Баатрин нертә Келн-улсин театрин артист, Хальмг Таңһчин ачта артист Очр Такаев, Хальмг Таңһчин ачта артистк Ольга Надвидова, Әрәсән Федерацин сойлын ачта көдләч, «Теегин герл» седкүлин ах редактор Раиса Манжилеева марһанд орлцсн цуг билгтнриг соңсч, теднә эрдминь үнлв. Шүлгиг ямаран кевәр умшсинь, шүлгчин ухан-тоолвриг, үүдәврин учр-утхиг әмтнд яһҗ медүлҗ чадсинь тедн йилһҗ хәләв.
Эн җил бичәчнр Җимбин Андрейин болн Куукан Анатолин 100 җилин өөн күцҗәнә. Түрүн бембә өдр эн бичәчнрин үүдәврмүдт шүлг умшсн улс оньган тусхав.
Хойрдгч бембә өдрлә Сән-Белгин Хасрин, Хоньна Михаилын, Буджала Егорин, Төвкнкин Эрнстин шүлгүдт әмтнә оньг тусхагдв.
Һурвдгч бембә өдрлә шүлгүд зуг хальмг келәр умшгдсмн. Иигәд марһана йовудт Хальмгин нертә бичәчнрин үүдәврмүд сергәгдҗ, бумбин өөр цуглрсн әмтиг шүлгүдин ке-сәәхн делкәлә таньлдулв.
Урн үгин делкәд баһчудыг орулдг марһана дииләчнриг ачллһна керг-үүлдврт Келн-улсин дегтрин һардач Майя Безыдеева шүлгүд умшлһарн ончрсн баһчудт мөрәһинь бәрүлҗ өгв. Хаврин сәәхн цагин темдг болгч марһан һурвн җил дарандан кегдҗәхинь, сойлын болн зуульчллһна министерствин дөңгәр эннь кегдҗәхин тускар саңгин һардач темдглв.
Элстин 21-ч тойгта дунд сурһулин сурһульч Флёр Секенова, Элстин техническ лицейин сурһульч Юлия Кравцова, Элстин 10-ч тойгта дунд сурһулин сурһульч Аюна Манджиева марһана диләчнр болв. Эднд Күндллһнә һашгуд болн үнтә белгүд бәрүлҗ өггдв.
Келхәс, Элстин 10-ч тойгта дунд сурһулин 6-ч классин сурһульч Аюна Манджиева Калян Санҗин «Элстин сувсрсн сө» гидг шүлгиг ик өргмҗтәһәр умшад, төрскн балһсндан йир дуртаһан медүлсинь жюри өөдән үнлсмн. Эн күүкнә багш Юлия Бембееван келсәр, марһанд умшх шүлгән Аюна бийнь шүүҗ авад белдсмн. Хальмг келндән дурта күүкн, Элст балһснд болсн марһанд түрүн орм эзллә, таңһчин марһанд Аюна хойрдгч орм эзлснә тускар сурһульчиннь күцәмҗиг темдглҗ багшнь келнә.
Юлия Кравцован билгиг цуглрсн олн хәләһәчнр чигн, жюрин гешүд чигн, марһанд орлцсн баһ наста билгтнр чигн тер дарунь ончлҗ темдглсмн. Буджала Егорин «Двери настежь» гидг шүлгиг сүркә кевәр әмтнә седкл авлҗ Юлия умшсмн.
Һурвн сурһульч урмдулгч мөрәһәр темдглгдв. Эннь С. Радонежскийин нертә Орс келн-улсин гимназин сурһульч Байрта Шарашкиева, Элстин 12-ч дунд сурһулин сурһульч Алина Манджиева, Очра Номтын нертә 8-ч тойгта дунд сурһулин сурһульч Лиҗ Цеденов болв.
Сүүлңк дунд сурһулин 8-ч классин сурһульч Лиҗ Цеденов Хоньна Михаилын «Улан бамб болҗ төрхин» туск шүлгиг умшад, хаврин сәәхн цецгүдин цагиг тодлулсн болҗ, олн күүнә оньг авлв. Билгтә шүлгчин болн зөргтә дәәчин теегин кеерүл болгч цецгүдин туск шүлгин учр-утхинь Лиҗ йир сәәхн медүлҗ чадснь йоста кевәр үнлгдв.
Эдниг йөрәһәд, Әрәсән бичәчнрин Ниицәнә Хальмг региональн әңгин ахлач, бичәч Татьяна Бадакова марһанд темдглгдсн сурһульчнрт Ханлтын бичгүд бәрүлҗ өгәд, дегтрмүд белглв. Сурһульчнрин күцәмҗиг темдглсн деерән Татьяна Ивановна тедниг сурһдг багшнрт ханллтан медүлв.
Иигәд Хальмгт хаврин байр, бамб цецгүдин наадм болсн кемлә шүлгләнә байр болдгнь тиим сән авъяст тохрҗана.

ХӨӨЧИН Галина