Беларусин делегац ирв

Мана таңһчд Беларусь Республикин Залврин элчнр ирв. Көлгнә министр Алексей Ляхнович болн Әрәсәд Беларусин элчллтин селвгч Юрий Булавко делегациг һардв.
Ирлһнә түрүн өдртнь күндтә гиичнр Н.Н.Пальмовин нертә Келн-улсин музейд одв. Тенд олн һәәхүл хәләҗ, Төрскән харсгч Алдр дәәнә ветеран, Витебск балһсиг немшнрәс сулдхсн Петр Леонтьевла харһҗ күүндв.
Нидн Петр Леонтьевич Беларусин Витебск балһснд одад, зурһан өдртән тенд бәәсән келв. Дәәнә күнд цагин тускар тодлад, Беларусин Залврин элчнрт кесг йовдлын тускар медүлв. Дәәнә ветеранла болсн харһлт үр-иньгин таалд давулгдв. Харһлтын чилгчәр Петр Леонтьев Беларусин делегацин гешүдт белгүд бәрүлҗ өгв.
Өцклдүр Беларусин делегац Хальмг Таңһчин Залврин элчнрлә болсн селвлцәнд орлцв. Тенд хулд-гүүлгәнә, тосхлтын, селәнә эдл-ахун, ЖКХ-н болн талдан төрмүд хаһлгдв. Энүнә тускар тодрхаһар мана газетин дарани тойгт умштн.

ОЛЬДАН Цаһан