Москвад хүрмин наадмд өркән өндәлһв

Арслң Хинеев болн Гилән Эрднеева Ик Буурла района муниципальн бүрдәцин һардврт көдлнә. Дәкәд Арслан Ик Буурла дунд сурһульд тууҗин багшар көдлнә. Келхд, эн одахн «Җилин сән багш» гидг таңһчин марһанд 2-ч орм эзлсмн. Баһчуд Хальмг ик сурһульд сурчасн цагтан таньлдад, нег-негнәннь седкл медҗ, өрк-бүлән өндәлһх шиидвр авсмн. Арслң бийнь Яшкулин районас, Гилән болхла Лаганя района Буранное селәнд өсәд-боссмн.

Эдн мөрн сард һар цаас кехәр зуралҗасн билә, ВДНХ-д хүрмин наадмд орлцх үрвр кехлә, эдн зөвән өгв. Цугәрәсән наадмд орлцхин төлә баһчуд хальмг хувц өмсҗ, келн-улсин сойлла таньлдулхар шиидв. Эднд Хальмг Таңһчин делгрлтин саң белдвр кехд, Москва орх болн тенд бәәх һаруһинь даңцаҗ, дөң-тусан күргв.
- Маднла хамдан Әрәсән Өмн үзгин, Ар Кавказин, ЛНР-ин, ДНР-ин болн Крымин баһчуд нег өдр һар цаас кев. Цуһар нег-негән йөрәҗ, хоорндан таньлдвидн, тегәд наадм байрта кевәр давв. Һәәхүлд орлцсн улс маднла таньлдад, альдас ирсиг соньмсад, хамдан зурган цокулв. Һар цаас кеснә хөөн байрин концерт болв. Москва балһснд үүлддг «Үрс Сар» ансамбль хальмг би биилҗ, олн-әмтиг байрлулв. Мана элгн-садн, үр-иньгүд наадмд орлцхар ирв. Мини багш Элла Церенова Москва балһснд ирҗ, ончта йовдлла мадниг йөрәһәд ик байр үүдәв. Бидн хамдан Хальмг Таңһчин һәәхүл хәләҗ цаган сергмҗтәһәр давулвидн. Эн өдриг бидн кезә чигн мартшговидн, - гиҗ Арслң келв.
Һар цаас кесн баһчудыг Хальмг Таңһчин һәәхүлд орлцсн Көтчнрә района делегац байртаһар тосад, ду-бииһән үзүләд, өрк-бүлнь бат болҗ олн җилдән хамдан нииитә бәәхиг дурдв. Района толһач Һооҗура Санл Арслңд маля, Гиләнд болхла хальмг ааһ белглв. Мана таңһчин һәәхүл хәләхәр ирсн олн гиичнр баһчудыг бас йөрәҗ, хөв-кишг дурдв.
Арслң Гилән хойр ноха сард хүрмән кехәр зуралҗана. Эднә нәәрт олн элгн-саднь, нәәҗнрнь, хамдан көдлҗәдг үүрмүднь орлцхмн. Баһчуд эднд Москва балһснд Цугәрәсән хүрмин наадмд орлцсна туск зургуд болн видео үзүлҗ, дәкәд нег эн ончта ойвдлыг тодлх.
ДООҖАН Наталья
ЗУРГТ: Хинеевихн «Әрәсә» һәәхүлд Көтчнрә района делегацла харһв