Олнд туста эрдм дасх

Давсн басң өдрлә, моһа сарин 24-д Элстд Хальмг ик сурһульд темдгтә йовдл болв. Таңһчин һоллгч вузин Бичкдүдин ик сурһулин төгсәһәчнриг энд тоов. 11-ч классан төгсәҗәх 75 арвт нааран ирв. Эднәс икнкнь 8-ч классас авн физик, эсв, химий, биологий, англь кел, тууҗ, обществознань хальмг вузин багшнрин һардврт гүүнәр дасҗ сән медрл авв, ЕГЭ-н шүүврт чигн эднә һардврт белдв.
Арвтнриг сурһулян төгсәсн йовдлла Б.Б.Городовиковин нертә Хальмг ик сурһулин һардачин дарук, селәнә эдл-ахун номин кандидат Оксана Кониева йөрәв.
- Хальмг ик сурһулин Бичкдүдин ик сурһуль 2018 җилд секдлә. Тер цагас нааран Элстин болн райодын 700 сурһульч энүг төгсәлә. Энд бат медрл авчкад Әрәсән хамгин сән вузмудт болн Хальмг ик сурһульд орҗ оютнр болв. Эндр 2024 җилин 75 төгсәһәчин байрин асхн болҗана, эн йовдлла багшнрин болн мана вузин коллективин нерн деерәс зүркни седкләсн йөрәҗәнәв, – гиҗ Оксана Николаевна келсн үгдән темдглв.
Эндр Бичкдүдин ик сурһульд 8-11 классин 135 сурһульч сурна. Эдн олн зүсн кичәләр 22 багд медрлән гүүдүлҗ 8-ч классас авн орна, сүл җилд эдн ЕГЭ-н шүүвр өглһнд белднә. Эдниг Хальмг ик сурһулин сән гисн багшнр эсвәр, физикәр, биологийәр, химийәр болн нань чигн кичәләр медрл өгнә. Эн җил 75 күн бичкдүдин ик сурһулиг төгсәв гиҗ Оксана Николаевна темдглв.
Һаха сард шинәс сурһульчнр орулгдх, түүнә өмн эдн хальмг вузин багшнрла күүндвр кеҗ, медрлән үзүлх, түүнә ул деер тедниг Бичкдүдин ик сурһульд орулх. Эдн сән медрл авсн деерән ЕГЭ-н шүүврән чигн сәәнәр өгнә. 2018 җиләс авн цуг төгсәһәчнрәс 30 процентнь Хальмг ик сурһульд орв.
Эн җилин һаха сарас авн холас көдлдг багмуд секгдх гиҗ күләгдҗәнә, түүнд райодын сурһульчнр сурч чадх. Түүнә төлә кен бичкдүдин ик сурһульд медрлән гүүдүлҗ, шүүврт сәәнәр белдхәр бәәнә гиҗ хальмг вузин проректор болн багшнр райодын сурһуль-эрдмин әңгст сурвран өглә. Мөчн сарла райодын сурһульчнрас багмуд тогтагдх, һаха сарас авн теднлә онлайн кичәлмүд эклх. Тегәд цуг райодын сурһульчнр Бичкдүдин университетд орҗ сән белдвр авч чадх.
Цааранднь төгсәһәчнриг һазадын орна оютнрин негдлтин ахлач Ансельм Хундайи йөрәҗ таңһчин вузин тускар келҗ өгв. «Ик сурһульд орнав гиһәд, холд йовад керг уга. Хальмг вузд һазадын орна 1800 оютн сурна. Сүл җилмүдин эргцд Хальмг ик сурһулин хату цаасиг һазадын орна 3 миңһ иргн авад, ода эрдмәрн делкән кесг орн-нутгт көдлҗәнә.
Таңһчин һоллгч вуз һазадын орна вузмудла 100 бооца батлв, тер тоод Китдин, Моңһлын, Узбекистана,Киргизин, Казахстана болн нань чигн орн-нутгудла номин өргн хамцу шинҗллт күцәҗәнә. Цуг оютнрт энд сурһулин болн номин көдлмшин, амрлһна төлә сән таал тогтагдсн бәәнә», – гиҗ Ансельм Хундайи келв.
Тер мет Элстин 3-ч болн 10-ч дунд сурһульмудын һардачнр арвтнриг йөрәв. «Мана таңһчин 90 процент багшнрнь Хальмг ик сурһуль төгсәлә. Тадн чигн Бичкдүдин ик сурһульд гүн медрл авад, ЕГЭ шүүврән сәәнәр өгәд, һоллгч хальмг вузд орҗ сурхт», – гиҗ эдн йөрәв. Эдн кесг җилин туршарт Бичкдүдин ик сурһульла нөкцлтҗәнә, тер сән көдлмшин төлә эднд хальмг вузин Ханлтын бичгүд бәрүлҗ өггдв.
Тер мет төгсәһәчнриг М.Ломоносовин нертә МГУ-н тиңкмин һардач Мария Бутина, Бичкдүдин ик сурһулин һардач Евгения Анкишева йөрәҗ, тадн күчр-күнд йовдлла харһсн бийнь, сәәнәр сурад, ЕГЭ-н шүүвр өгхин төлә сән белдвр авлат, таднд күцәмҗ дурдҗанавидн, шүүҗ авсн эрдмәрн цааранднь сурч таңһчдан туста иргнмүд болтн гиҗ дурдв. Дарунь ик баг арвтнрт - удл уга абитуриентнр болх баһчудт Бичкдүдин ик сурһуль төгсәснә туск сертификатмуд бәрүлҗ өггдв.
Тер мет эдниг белдсн багшнрин ик багд цецгүд бәрүлҗ өгәд, теднә ик тәвцинь темдглв. Нааран ирсн эк-эцкнр бас үгән келҗ хальмг вузин багшрт ханлтан өргв.
ТҮРВӘН Һуна