Цергчнрт дөңгән күргв

Хальмг Таңһчин Улсин Хуралын (Парламентин) депутат Хачира Борис шишлң цергә керг-үүлдврт орлцачнрт дөңгән күргҗ, эднә төрмүдт шунмһа кевәр орлцна. Шидр эн цергә даалһвран күцәҗ йовдг нег һазра улст золһад ирв. Туршулчнрин багмудыг һардҗадг хальмг цергчнр энүнлә харһхар Часов Яр болн Бахмут балһсдын өөр шидрәс ирв. Мана хальмг залус зөрмг кевәр дәәлдҗ йовхнь энүнд ик бахмҗ үүдәв.

- Йоста хальмг баатрмуд дән-даҗг болҗах һазрт олн җилдән церглҗ йовна. Эдн эн һазриг сәәнәр меддгнь учрта, юңгад гихлә 2014 җиләс авн эврә сән дурар энд церглҗәнә. Урднь эдн Сирия орн-нутгт цергә даалһвр күцәҗ, залу-зөрмгән үзүлсн улс мөн. Эдн төрскнч седклтә, чик авг-бәрцтә залус болҗана. Арвн җил хооран эдн Донбассин улст зовад, энд церглхәр шиидсмн, ода болхла, эдн бооца батлад цергә керг-үүлдврт орлцҗана. Эднә һардврт бәәдг цергчнрин тускар ухалад, эдн олсн мөңгәрн олн зүсн эв-арһс, кергсл хулдҗ авна, – гиҗ Хачира Борис келнә.
Депутат мана цергчнр сурсн көлг, FPV нисдг эв-арһс авч ирв. Дәкәд эн ус, хот-хол, шам өгдг кергсл авч ирсн билә, болв цергчнр терүг талдан һазрт церглҗәдг нег һазра улст күргҗ өгхиг сурв. Тегәд Хачира Борис Токмак балһсна өөр церглҗәдг мана цергчнрт күргҗ өгв. Тенд цергә даалһвран күцәҗ йовдг мана залу улсла харһад, таңһчин әмтнәс халун менд күргв.
БАТАН Наталья
ЗУРГТ: депутат Хачира Борис нег һазра цергчнрлә харһв