Иньгллтин концертс

Назрань балһснд Келн-улсин оркестр концертән үзүлснь сойлын ик чинртә йовдл болв.

Йоста иньгллтин концерт гиҗ Ингушетин хәләһәчнр терүг үнлв.
Соньн эн концертиг Хальмг Таңһчин, Моңһлын болн Ингушетин ачта артистк Данара Шалханова йөрәлин үг келҗ секв.
Дурна туск «Һурвн альмн», «Дождь» болн Майкл Джексона көгҗмәр үүдәгдсн айсмуд ингушск соңсачнрин ик тааслт олсна тускар Ингушетин сойлын министерствин зәңгллһнә әңгин һардач Хатимат Хадзиева тоолврарн хувалцсна тускар «Сердало» газетд бичҗ.
«Тана көгҗмиг соңсхларн теегт идшлҗ йовх мөрд үзсн болҗ, теднә довтллһ дахҗ биилх дурн күрнә. Ут дууна айст өргн тег наласн болҗ, теегин салькн хурлзсн болҗ медгднә. Концерт маднд байр үүдәв» – гиҗ хәләһәчнр ухан-тоолврарн хувалцв.
«Неформат» (көгҗмин шог) гиҗ нерәдгдсн концертин дарани нег әңгнь чигн ик соньмслт үүдәв. Үүдәгч багин шин эн төсвлә элстихн шидр таньлдсн билә.
Ингушетин Толһачин һардврин болн залврин нерн деерәс Келн-улсин оркестрт Ханлтын бичг бәрүлҗ өггдв. Хальмг Таңһч болн Ингушеть Республик хоорндк иньгллтин залһлда батллһнд орулҗах үүдәгч коллективин тәвц тиигҗ үнлгдв. Ингушеть Республикин сойлын министерствин Күндллһнә һашгудар оркестрин артистнр болн көгҗмчнр ачлгдв. Сойл болн билг-эрдм тиигәд меҗә һатлад, хоша бәәх республикүдиг хамцулв.
Кабардино-Балкарин хотл Нальчик балһснд болсн концерт чигн ик күцәмҗтәһәр давв. Хальмгин Келн-улсин оркестрин концертд Кабардино-Балкарин ачта артист Мурат Малкаров орлцҗ, билг-эрдмән үзүлснь нег үлү өргмҗтә болв.
Ода Келн-улсин оркестр Москвад болх концертдән белдҗәнә. Мөчн сарин 7-д көгҗмин нарт-делкән Московск нертә оркестрин ик концерт болхмн.
ҖИРҺЛИН Кермн