Күцәмҗтә хаалһсар

Бичкн биичнрин нер туурсн коллектив эн җил олн марһанд болн хәләврмүдт орлцад, диилвр бәрҗ, Хальмгин нер һарһҗана. Шидр коллектив Дагестанд болсн нарт-делкән хәләврт хальмг бииһин ке-сәәхниг сүркә сәәнәр үзүләд, диилвр бәрәд ирв. Энүнә тускар «Тюльпанчик» ансамблин художественн һардач, Хальмг Таңһчин сойлын ачта көдләч Людмила Толкачева седкүлчнрт келҗ өгв.

«Хәләврмүдт орлцлһн билг-эрдмән делгрүлхд, талдан һазрин коллективсин эрдмлә таньлдх, бииһин халхар шин ямаран керг-үүлдвр күцәгдҗәхинь медҗ авхд туслна, – гиҗ Людмила Толкачева келнә. – Иигәд Дагестанд бидн таньлдсн коллектив мадниг бар сард болх эврә фестивальдан үрвр кев. Поленовин нертә улсин үүдәлтин гертә үүлдврин зөвшәл батлад, олн хәләврмүдт орлцх арһта болвидн. Җилин ашар Москвад чигн билг-эрдмән үзүлх таал учрҗана».
Ансамблин һардач Заяна Наранован келсәр, бичкдүдин хореографическ коллективсин регионмуд хоорндк ик хәләвр бүрдәһәд ансамбль бас нег дамшлт авв. Элстд эн керг-үүлдвр күцәлһнд дөң болсн цуг бүрдәцст ханлтан медүлҗәхән һардач келв. Марһана түрүн өдр мастер-классмуд болад, шин олн бииг бичкн биичнр дасв. Хойрдгч өдрләнь байрин ик концерт болсинь элстихн мартхш. Иим наадм җил болһн кехлә сән болхин тускар келгдв.
Шидр коллективин баһ наста орлцачнрин шүүвр болсмн, тедн цугтан сән белдвр үзүлв. Ансамбльд бичкн биичнрт бииһин эрдмиг Эрднь Босхомджиев, Гиляна Сангаева дасхҗана. Мөрн сарин 10-д коллективд биилх саната күүкд-көвүдиг йилһҗ авх шүүвр болхмн. Дәкн нег шүүвр ноха сарин дундурар болх гиҗ зуралгдв.
Ода «Тюльпанчик» Киргизьд нарт-делкән наадмд орлцхар йовҗана. Тенд биичнрин коллектив Хальмгин болн Цугәрәсән нерн деерәс орлцхмн.
ҖИРҺЛИН Кермн