Герлтә, кишгтә хаалһар йовтха!

01-06-2024, 15:49 | Общество, Таңһчин зәңгс, Зіњг, Сойл

Эндр, зуни түрүн өдрлә, өкәр мана бичкдүдт нерәдсн байр темдглгдҗәнә. Күн болх баһасн, күлг болх унһнасн, гиҗ келгддгәр, бичкнәснь авн өвкнрин авъясар дамҗад, үрдтән бидн чик сурһмҗ, сән сурһуль өгч өскхәр зүткнәвидн.

Әрәсән Президент Владимир Путинә Зәрлгәр Өрк-бүлин җил гиҗ зарлгдсар, бичкдүдт нерәдсн Өдр хойр дам байрта, темдгтә болҗана. Сүл җилмүдт орн-нутгт, нег үлү мана таңһчд, олн үртә өрк-бүлмүдин то өсәд йовна, эннь байрта йовдл мөн. Өдгә цагт мана таңһчд бәәдг 52 миңһн һар өрк-бүлд 63 миңһн һар үрн өсчәнә. Олн үртә өрк-бүлмүдт йилһгддг дөңнлһнә эв-арһс икдәд, эднә то өсәд йовна, гиҗ темдглх кергтә. Тер мет эндр Хальмг Таңһчд үртә өрк-бүлмүдиг өргнәр дөңнҗәнә. Тодлхас, 2023 җилин туула сарин 1-әс авн мана таңһчд һарсн нилх болһн Хальмгин Толһачин белг авдг болв.
Олн үртә өрк-бүлмүдт эк-эцкиннь альхн деер өссн көвүд-күүкд җирһлин туршарт нег-негндән нүдн-амн болҗ, ниитәһәр бәәдг. Эк-эцкдән хәәртә үрд болад, сурһулян сәәнәр сурч, төрскнч седклтә улс болҗ өснә.
– Эндр мана таңһчд ЖКХ-н туслмҗд һарһҗ өгдг мөңгнә хүвнь иим өрк-бүлмүдт даңцагдна. Тер мет дунд сурһульмудт эклц классмудын сурһульчнр өңгәр хотар теткгднә. Җил болһн ноха сард шин сурһулин җилд белдәд олн үртә өрк-бүлин сурһульч болһнд мөңгнә дем йилһгднә. Иим кевәр дөңнлһнә эв-арһс цааранднь икдәд йовхмн, – гиҗ эн җилин эклцәр, Өрк-бүлин җил секлһнә байрин йовудт Хальмг Таңһчин Толһач Хаска Бату зәңглсн билә.
Эн өдрмүдт дунд сурһулян төгсәҗәдг көвүд-күүкд ОГЭ-н болн ЕГЭ-н шүүврән өгчәнә. Авсн медрлән олзлҗ, шаңһа шүүврән сәәнәр өгтхә, шүүҗ авсн сурһуль-эрдмин бүрдәцст орҗ сурад, цааранднь төрскн һазриннь нерән дуудулҗ йовтха, гиҗ дурдҗанавидн.
Бичкдүдин сән Өдрт нерәдсн керг-үүлдврмүд эндр Элст балһснд болн райодын кесг талвңгудт бүрдәгдв. Кесг соньн марһаст нег һазра мана көвүд-күүкд шунмһаһар орлцҗ, цаган сергмҗтәһәр давулҗ чадҗана. Хальмг Таңһчин хәәртә бичкдүд герлтә, кишгтә, цаһан хаалһар йовтха!

КАРСАНА Евгения

Видео